നിപയെ കുറിച്ചുള്ള പോസ്റ്റ് ‘വൈറസി’ന്റെ പരസ്യമെന്ന് ആരോപിച്ചയാള്‍ക്ക് ചുട്ട മറുപടിയുമായി ടോവിനോ

മലയാള സിനിമ താരങ്ങൾ എല്ലാം തന്നെ സാമൂഹിക പ്രതിബദ്ധതയുള്ള വ്യക്തികളാണ്, എന്ത് പ്രശ്നങ്ങളും ദുരന്തങ്ങളും വരുമ്പോൾ അവബോധം നൽകുവാൻ അവർ എന്നും മുൻപന്തിയിൽ തന്നെയുണ്ടാവാറുണ്ട്. അടുത്തിടെ പ്രളയം വന്നപ്പോൾ മലയാളത്തിലെ എല്ലാ സിനിമ താരങ്ങളും നേരിട്ട് തന്നെ സഹായത്തിന് ഇറങ്ങിയിരുന്നു എന്നാൽ കൂടുതൽ കൈയടി നേടിയത് ടോവിനോ തോമസ് തന്നെയായിരുന്നു. ഇപ്പോൾ സംസ്ഥാനത്ത് ചർച്ച വിഷയം നിപ വൈറസിന്റെ രണ്ടാം വരവ് തന്നെയാണ്. നിപയെ കുറിച്ചു അവബോധമായി ഒരുപാട് താരങ്ങൾ മുന്നോട്ട് വന്നിരുന്നു. ഇതുമായി ബന്ധപ്പെട്ട് ടോവിനോ തന്റെ ഇൻസ്റ്റാഗ്രാമിൽ പങ്കുവെച്ച ഒരു പോസ്റ്റിന് താഴെ വന്ന കമെന്റാണ് മലയാളികൾ ഏറെ ഞെട്ടലോടെ ഇപ്പോൾ നോക്കിക്കാണുന്നത്.

വൈറസ് എന്ന ആഷിഖ് അബു ചിത്രത്തിന്റെ പ്രമോഷന്റെ ഭാഗമായാണ് നിപ വൈറസ് അവബോധ പോസ്റ്റ് ടോവിനോ ഇട്ടതെന്നാണ് അദ്ദേഹത്തിന്റെ അവകാശവാദം. നിങ്ങളുടെ സിനിമയ്ക്ക് വേണ്ടി പരസ്യം ഉണ്ടാക്കരുത് എന്നായിരുന്നു അദ്ദേഹത്തിന്റെ വാചകം. കമെന്റ് രേഖപ്പെടുത്തിയ വ്യക്തിക്ക് ഒരു ഉഗ്രൻ മറുപടിയാണ് ടോവിനോ ഇൻസ്റ്റാഗ്രാമിൽ നൽകിയത്. ഈ മനോഭാവം നിരാശയുണ്ടാക്കുന്നതാണെന്നും അങ്ങനെ തോന്നുണ്ടെങ്കിൽ ദയവായി നിങ്ങൾ സിനിമ കാണരുത് എന്നായിരുന്നു ടോവിനോയുടെ മറുപടി. ടോവിനോയെ പിന്തുണച്ചും ഒരുപാട് പേർ പോസ്റ്റിന്റെ താഴെ വന്നിരുന്നു. ഈദ് റിലീസായി വൈറസ് ജൂണ് 7ന് പ്രദർശനത്തിനെത്തും.