ഹാപ്പി ഡെയ്‌സ് താരം നിഖില്‍ സിദ്ധാര്‍ഥയുടെ വിവാഹം ഇന്ന്..!

കേരളത്തിലും വലിയ വിജയം നേടിയ തെലുങ്കു ചിത്രമായിരുന്നു ഹാപ്പി ഡേയ്സ്. ഈ ചിത്രത്തിലൂടെ ഇവിടെ ഒരുപാട് ആരാധകരെ നേടിയ നടനാണ് നിഖിൽ സിദ്ധാർത്ഥ. ഇപ്പോൾ നിഖിൽ സിദ്ധാർത്ഥ വിവാഹിതനാവുകയാണ് എന്ന വാർത്തയാണ് തെലുങ്കിൽ നിന്ന് വരുന്നത്. ഇന്ന് വിവാഹ ജീവിതത്തിലേക്ക് പ്രവേശിക്കുന്ന ഈ യുവ താരം താലി ചാർത്തുന്നത് പല്ലവി വർമ്മ എന്ന പെൺകുട്ടിയെയാണ്. ദീർഘകാലമായി ഇരുവരും പ്രണയത്തിലായിരുന്നു എന്നും വാർത്തകളുണ്ട്. ഡോക്ടറായ പല്ലവി വർമയുമായുള്ള നിഖിലിന്റെ വിവാഹം ഈ കഴിഞ്ഞ ഏപ്രില്‍ 16 നായിരുന്നു ആദ്യം തീരുമാനിച്ചിരുന്നത് എങ്കിലും കൊവിഡ് 19 പടര്‍ന്നു പിടിച്ച സാഹചര്യത്തില്‍ വിവാഹം മറ്റൊരു ദിവസത്തേക്ക് മാറ്റിവയ്ക്കുകയായിരുന്നു. ഇപ്പോഴിതാ അടുത്ത കുടുംബാംഗങ്ങളുടെ സാന്നിധ്യത്തില്‍ ലളിതമായ ചടങ്ങിൽ ഇരുവരും ഇന്ന് വിവാഹിതരാകുമെന്നാണ് തെലുങ്കു മാധ്യമങ്ങൾ റിപ്പോർട്ട് ചെയ്യുന്നത്.

നിഖിലിന്റെ സുഹൃത്തുക്കളിൽ നിന്ന് ലഭിച്ച വിവരം എന്ന് പറഞ്ഞു കൊണ്ടാണ് തെലുങ്കു മാധ്യമങ്ങൾ ഈ വാർത്ത പങ്കു വെച്ചിരിക്കുന്നത്. കൊവിഡ് 19 കാലത്ത് പാലിക്കേണ്ട സര്‍ക്കാര്‍ മാനദണ്ഡങ്ങള്‍ പാലിച്ചു കൊണ്ട് ഹൈദരാബാദിലെ നിഖിലിന്‍റെ ഫാം ഹൗസില്‍ വെച്ചായിരിക്കും വിവാഹ ചടങ്ങ് നടക്കുകയെന്നും റിപ്പോർട്ടിൽ പറയുന്നുണ്ട്. എന്നാൽ തന്റെ വിവാഹവുമായി ബന്ധപെട്ടു പരക്കുന്ന അഭ്യൂഹങ്ങളെ കുറിച്ച് നിഖിലോ കുടുംബമോ ഔദ്യോഗികമായി ഇത് വരെ പ്രതികരിച്ചിട്ടില്ല. നിഖിലിനെ താരമാക്കിയ, ശേഖര്‍ കമ്മൂല സംവിധാനം ചെയ്ത ചിത്രം ഹാപ്പി ഡേയ്‌സ് പതിമൂന്നു വർഷം മുൻപാണ് റിലീസ് ചെയ്‌തത്‌. വരുണ്‍ സന്ദേശ്, തമന്ന എന്നിവരും പ്രധാന കഥാപാത്രങ്ങളായി എത്തിയ ഈ ചിത്രത്തിൽ രാജേഷ് എന്ന കഥാപാത്രമായാണ് നിഖിൽ അഭിനയിച്ചത്.