ഉണ്ണി മുകുന്ദന് ശേഷം ചന്ദ്രോത് പണിക്കർ ആയി സുനിൽ ഷെട്ടി

കംപ്ലീറ്റ് ആക്ടർ മോഹൻലാൽ നായകനായ പ്രിയദർശൻ ചിത്രമാണ് മരക്കാർ അറബിക്കടലിന്റെ സിംഹം. നൂറു കോടി രൂപ ബഡ്ജറ്റിൽ അണിയിച്ചൊരുക്കിയ ഈ ചിത്രം ഈ വർഷം മാർച്ച് 26 ന് ലോകം മുഴുവൻ റിലീസ് ചെയ്യും. ഇതുവരെ ഈ ചിത്രത്തിന്റെ മൂന്നു ഒഫീഷ്യൽ പോസ്റ്ററുകളും രണ്ടു കാരക്റ്റർ പോസ്റ്ററുകളും റീലീസ് ചെയ്യുകയും വലിയ തരംഗമാവുകയും ചെയ്തിരുന്നു. കീർത്തി സുരേഷ് അവതരിപ്പിക്കുന്ന ആർച്ച, അർജുൻ അവതരിപ്പിക്കുന്ന ആനന്ദൻ എന്നീ കഥാപാത്രങ്ങളുടെ പോസ്റ്ററുകളാണ് ഇതുവരെ പുറത്തു വന്നതെങ്കിൽ ഇന്ന് റിലീസ് ചെയ്തിരിക്കുന്നത് ബോളിവുഡ് താരം സുനിൽ ഷെട്ടി അവതരിപ്പിക്കുന്ന ചന്ദ്രോത് പണിക്കർ എന്ന കഥാപാത്രത്തിന്റെ പോസ്റ്ററാണ്. കഴിഞ്ഞ വർഷം അവസാനം റിലീസ് ചെയ്ത മാമാങ്കം എന്ന മമ്മൂട്ടി ചിത്രത്തിൽ ഉണ്ണി മുകുന്ദൻ അവതരിപ്പിച്ച കഥാപാത്രത്തിന്റെ പേരും ചന്ദ്രോത് പണിക്കർ എന്നായിരുന്നു.

ഈ രണ്ട് ചിത്രത്തിലും സാമൂതിരി ഒരു കഥാപാത്രം ആയതിനാൽ ഈ രണ്ടു കഥാപാത്രങ്ങളും ഒന്നു തന്നെയാണോ എന്നറിയാനുള്ള ആകാംഷയിലാണ് ഇപ്പോൾ മലയാള സിനിമാ പ്രേമികളും ആരാധകരും. ലോകം മുഴുവൻ മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളിൽ ആയി 50 ലധികം രാജ്യങ്ങളിലെ അയ്യായിരത്തോളം തീയേറ്ററുകളിൽ ഈ ചിത്രം റിലീസ് ചെയ്യാനാണ് പ്ലാൻ. ഇനിയും ഒട്ടേറെ താരങ്ങൾ അണിനിരക്കുന്ന ഈ ചിത്രത്തിലെ മറ്റു കഥാപാത്രങ്ങളുടെ പോസ്റ്ററുകൾ അടുത്ത ദിവസങ്ങളിൽ റിലീസ് ചെയ്യുമെന്നാണറിവ്. ആശീർവാദ് സിനിമാസ്, കോണ്ഫിഡന്റ് ഗ്രൂപ്, മൂൺ ഷോട്ട് എന്റർടൈന്മെന്റ് എന്നിവയുടെ ബാനറിൽ ആന്റണി പെരുമ്പാവൂർ, ഡോക്ടർ സി ജെ റോയ്, സന്തോഷ് ടി കുരുവിള എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്.