തൽക്കാലം ഈ അയ്യപ്പൻ കോശി സീസൺ ഒന്ന് തീർന്നോട്ടെ; പൃഥ്വിരാജ്- ബിജു മേനോൻ ചിത്രത്തിന്റെ ട്രൈലെർ ശ്രദ്ധ നേടുന്നു

അനാർക്കലി എന്ന സൂപ്പർ ഹിറ്റ് ചിത്രത്തിന് ശേഷം പ്രശസ്ത രചയിതാവായ സച്ചി സംവിധാനം ചെയ്ത പുതിയ ചിത്രമാണ് അയ്യപ്പനും കോശിയും. അനാർക്കലിയിൽ പ്രധാന വേഷങ്ങൾ ചെയ്ത യുവ സൂപ്പർ താരം പൃഥ്വിരാജ് സുകുമാരനും ബിജു മേനോനും തന്നെയാണ് ഈ ചിത്രത്തിലെ ടൈറ്റിൽ കഥാപാത്രങ്ങളായ കോശിയും അയ്യപ്പനുമായി യഥാക്രമം എത്തുന്നത്. അടുത്ത മാസം ഏഴിന് റിലീസ് ചെയ്യാൻ പോകുന്ന ഈ ചിത്രത്തിൽ പ്രശസ്ത സംവിധായകനും രചയിതാവും നടനുമായ രഞ്ജിത്തും ഒരു പ്രധാന വേഷം ചെയ്യുന്നുണ്ട്. മികച്ച പ്രേക്ഷക ശ്രദ്ധ നേടിയ ഇതിന്റെ ടീസറിനും പോസ്റ്ററുകൾക്കും ശേഷം ഇപ്പോഴിതാ ഈ ചിത്രത്തിന്റെ ട്രൈലെർ പുറത്തു വന്നിരിക്കുകയാണ്. പക്കാ മാസ്സും അതോടൊപ്പം ക്ലാസും സമന്വയിപ്പിച്ച ഒരു ചിത്രമായിരിക്കുമിതെന്ന സൂചനയാണ് ഈ ട്രൈലെർ നൽകുന്നത്.

ഫഹദ് ഫാസിൽ, ആസിഫ് അലി, നിവിൻ പോളി, ടോവിനോ തോമസ്, ഇന്ദ്രജിത് സുകുമാരൻ, മുരളി ഗോപി, കുഞ്ചാക്കോ ബോബൻ, മഞ്ജു വാര്യർ, സണ്ണി വെയ്ൻ, ഉണ്ണി മുകുന്ദൻ, ജയറാം, ആന്റണി വർഗീസ്, അജു വർഗീസ്, ജയസൂര്യ, കാളിദാസ് ജയറാം, മിയ ജോർജ്, വിനീത്, ഹണി റോസ്, ഗോകുൽ സുരേഷ്, ജോജു ജോർജ്, അനൂപ് മേനോൻ, സാനിയ ഇയ്യപ്പൻ, ഐശ്വര്യ ലക്ഷ്മി, മമത മോഹൻദാസ് എന്നിവരാണ് ഈ ചിത്രത്തിന്റെ ട്രൈലെർ സോഷ്യൽ മീഡിയയിൽ ഇന്ന് രാവിലെ പത്തു മണിക്ക് റിലീസ് ചെയ്തത്. സച്ചി തന്നെ രചനയും നിർവഹിച്ച ഈ ചിത്രം നിർമ്മിച്ചിരിക്കുന്നത് ഗോൾഡ് കോയിൻ മോഷൻ പിക്‌ചേഴ്‌സിന്റെ ബാനറിൽ സംവിധായകൻ രഞ്ജിത്തും പി എം ശശിധരനും ചേർന്നാണ്.