ഷാജി കൈലാസിന്റെ മകൻ സംവിധായകനാകുന്നു; നായകനായി പ്രശസ്ത യുവതാരം

മലയാള സിനിമയിലെ മാസ്സ് ചിത്രങ്ങളുടെ തമ്പുരാനാണ് ഷാജി കൈലാസ്. അദ്ദേഹം സംവിധാനം ചെയ്ത മാസ്സ് ചിത്രങ്ങൾ എന്നും പ്രേക്ഷകർ നെഞ്ചോട് ചേർക്കുന്നവയാണ്. മോഹൻലാൽ, മമ്മൂട്ടി, സുരേഷ് ഗോപി, പൃഥ്വിരാജ്, ദിലീപ് തുടങ്ങിയ എല്ലാ സൂപ്പർ താരങ്ങളെ വെച്ചും ചിത്രങ്ങൾ സംവിധാനം ചെയ്തിട്ടുള്ള ഷാജി കൈലാസ് ഒരുക്കിയ രണ്ട് ചിത്രങ്ങളാണ് ഇപ്പോൾ പ്രദർശനത്തിന് ഒരുങ്ങുന്നത്. മോഹൻലാൽ നായകനായ എലോൺ, പൃഥ്വിരാജ് നായകനായ കാപ്പ എന്നിവയാണവ. സുരേഷ് ഗോപി നായകനായ ചിന്താമണി കൊലക്കേസ് രണ്ടാം ഭാഗം ഒരുക്കാനുമുള്ള പ്ലാനിലാണ് അദ്ദേഹം. എന്നാൽ അതിനൊപ്പം ഒരു ചിത്രം നിർമ്മിക്കാനും കൂടെ പ്ലാൻ ചെയ്യുകയാണ് ഷാജി കൈലാസ്. ഷാജി കൈലാസ് പ്രൊഡക്ഷൻസിന്റെ ബാനറിൽ അദ്ദേഹം നിർമ്മിക്കാൻ പോകുന്ന ചിത്രം സംവിധാനം ചെയ്യുന്നത് അദ്ദേഹത്തിന്റെ മകനായ ജഗൻ ഷാജി കൈലാസാണ്.

നേരത്തെ അഹാന കൃഷ്ണകുമാറിനെ പ്രധാന കഥാപാത്രമാക്കി കരി എന്ന മ്യൂസിക്കൽ വീഡിയോ സംവിധാനം ചെയ്തിട്ടുള്ള ജഗൻ ഒരുക്കാൻ പോകുന്ന ആദ്യ ചിത്രത്തിൽ ആസിഫ് അലിയാണ് നായക വേഷം ചെയ്യാൻ പോകുന്നത്. ഈ ചിത്രത്തിന്റെ ഒഫീഷ്യൽ പ്രഖ്യാപനം വൈകാതെ ഉണ്ടാവുമെന്നാണ് സൂചന. അധികം വൈകാതെ തന്നെ ഇതിന്റെ ഷൂട്ടിംഗ് ആരംഭിക്കുമെന്നും സൂചനയുണ്ട്. നേരത്തെ ഇന്ദ്രജിത് നായകനായി എത്തിയ താക്കോൽ എന്ന ത്രില്ലർ ചിത്രവും ഷാജി കൈലാസ് നിർമ്മിച്ചിരുന്നു. നാൻ കടവുൾ, അങ്ങാടി തെരു, കടൽ, സർക്കാർ, പാപനാശം, പൊന്നിയിൻ സെൽവൻ, ഇന്ത്യൻ 2 തുടങ്ങി നിരവധി തമിഴ് ചിത്രങ്ങളുടെ രചന നിർവഹിച്ച ബി ജയമോഹനാണ് ജഗൻ ഷാജി കൈലാസ്- ആസിഫ് അലി ചിത്രത്തിന്റെ രചന നിർവഹിക്കുന്നത്.