സമയത്തിനെതിരെയുള്ള ഓട്ടം; കെ ജി എഫ് നിർമ്മാതാക്കളുടെ ഫഹദ് ഫാസിൽ ചിത്രം ആരംഭിച്ചു

കെ ജി എഫ് സീരിസ്, കാന്താര എന്നിവ നിർമ്മിച്ച് കൊണ്ട് ഇന്ത്യൻ സിനിമയിലെ തന്നെ ഏറ്റവും വലിയ പ്രൊഡക്ഷൻ ഹൗസുകളിൽ ഒന്നായി മാറിയ ടീമാണ് ഹോംബാലെ ഫിലിംസ്. ഇപ്പോൾ പ്രഭാസ്- പ്രശാന്ത് നീൽ ടീമിന്റെ സലാർ എന്ന ചിത്രവും നിർമ്മിക്കുന്നത് ഇവരാണ്. മലയാള സിനിമയിലേക്ക് ചുവടു വെച്ച ഇവർ നിർമ്മിക്കുന്ന ആദ്യ മലയാള ചിത്രമായ ധൂമം ആരംഭിച്ചു എന്ന വാർത്തയാണ് ഇപ്പോൾ പുറത്ത് വരുന്നത്. യുവ താരം ഫഹദ് ഫാസിൽ നായകനായി എത്തുന്ന ഈ ചിത്രം സംവിധാനം ചെയ്യുന്നത് പ്രശസ്ത കന്നഡ സംവിധായകനായ പവർ കുമാറാണ്. അപർണ്ണ ബാലമുരളി നായികാ വേഷം ചെയ്യുന്ന ഈ ചിത്രത്തിന്റെ ഷൂട്ടിംഗ് ബാംഗ്ലൂരിൽ പുരോഗമിക്കുകയാണെന്നാണ് ഏറ്റവും പുതിയ റിപ്പോർട്ടുകൾ പറയുന്നത്. മലയാളം, തമിഴ്, കന്നഡ, തെലുങ്ക് ഭാഷകളിലായി റിലീസ് ചെയ്യാൻ പ്ലാൻ ചെയ്യുന്ന ഈ ചിത്രത്തിൽ റോഷൻ മാത്യുവും അഭിനയിക്കുന്നുണ്ട്.

സംവിധായകൻ പവൻ കുമാർ തന്നെയാണ് ഈ ചിത്രം രചിച്ചിരിക്കുന്നതും. സമയത്തിനെതിരെയുള്ള ഒരു ഓട്ടമാണ് ഈ ചിത്രത്തിന്റെ ഇതിവൃത്തമെന്നാണ് സൂചന. ലൂസിയ എന്ന ചിത്രത്തിലൂടെ ദേശീയ ശ്രദ്ധ നേടിയ സംവിധായകനാണ് പവൻ കുമാർ. പ്രീത ജയരാമൻ ക്യാമറ ചലിപ്പിക്കുന്ന ധൂമം എന്ന ചിത്രത്തിന് സംഗീതമൊരുക്കുന്നത് പൂർണ്ണചന്ദ്ര തേജസ്വിയാണ്. ഹോംബാലെ ഫിലിംസിന്റെ ബാനറിൽ വിജയ് കിരാഗേന്ദുർ നിർമ്മിക്കുന്ന ഈ ചിത്രം അടുത്ത വർഷം പ്രേക്ഷകരുടെ മുന്നിലെത്തുമെന്നാണ് റിപ്പോർട്ടുകൾ പറയുന്നത്. മാരി സെൽവരാജ് ഒരുക്കിയ മാമന്നൻ എന്ന തമിഴ് ചിത്രം, അഖിൽ സത്യൻ ഒരുക്കുന്ന പാച്ചുവും അത്ഭുത വിളക്കും എന്ന മലയാള ചിത്രം, തെലുങ്കിൽ സുകുമാർ ഒരുക്കുന്ന അല്ലു അർജുൻ ചിത്രമായ പുഷ്പ 2 എന്നിവയാണ്, ധൂമം കൂടാതെ ഫഹദ് ഫാസിൽ അഭിനയിച്ച് അടുത്ത വർഷം എത്തുന്ന ചിത്രങ്ങൾ.