ബാലയ്യയുടെ വീരസിംഹ റെഡ്‌ഡി എത്തുന്നു; ജയ് ബാലയ്യ മാസ്സ് ഗാനം എത്തി

തെലുങ്ക് സൂപ്പർ താരം നന്ദമുരി ബാലകൃഷ്ണ എന്ന ബാലയ്യ നായകനായി എത്തുന്ന ഏറ്റവും പുതിയ ചിത്രമാണ് വീരസിംഹ റെഡ്‌ഡി. അടുത്ത വർഷം ജനുവരിയിൽ സംക്രാന്തി റിലീസായി എത്തുന്ന ഈ ചിത്രത്തിലെ ആദ്യ ഗാനം ഇപ്പോൾ പുറത്ത് വന്നിരിക്കുകയാണ്. ബാലകൃഷ്ണ ആരാധകർക്ക് വേണ്ടി ഒരുക്കിയ ജയ് ബാലയ്യ എന്ന മാസ്സ് ഗാനമാണ് ഇപ്പോൾ റിലീസ് ചെയ്തിരിക്കുകയാണ്. സംഗീത സംവിധായകൻ എസ് എസ് തമൻ ഒരുക്കിയ ഈ ഗാനത്തിന് വരികൾ രചിച്ചത് സരസ്വതിപുത്ര രാമജോഗയ്യ ശാസ്ത്രിയാണ്. കരിമുള്ളയാണ് ഈ ഗാനം ആലപിച്ചിരിക്കുന്നത്. സോഷ്യൽ മീഡിയയിൽ ഇപ്പോഴേ ഹിറ്റായി മാറിയ ഈ ഗാനത്തിന്റെ ഹൈലൈറ്റ് ബാലയ്യയുടെ നൃത്ത ചുവടുകളാണ്. ഈ ചിത്രത്തിന്റെ കഥയും തിരക്കഥയുമെഴുതി സംവിധാനം ചെയ്തിരിക്കുന്നത് ഗോപിചന്ദ് മല്ലിനേനി ആണ്. കറുത്ത ഷർട്ടും നരച്ച താടിയും പിരിച്ചു വെച്ച മീശയും കൂളിംഗ് ഗ്ലാസും അണിഞ്ഞ്, മുണ്ടുടുത്താണ് മാസ്സ് ലുക്കിൽ ബാലയ്യ ഈ ചിത്രത്തിൽ പ്രത്യക്ഷപ്പെടുന്നത്.

അദ്ദേഹത്തിന്റെ നൂറ്റിയേഴാം ചിത്രമായി ഒരുക്കിയ വീരസിംഹ റെഡ്‌ഡി നിർമ്മിച്ചിരിക്കുന്നത് മൈത്രി മൂവി മേക്കേഴ്‌സാണ്. ശ്രുതി ഹാസൻ, ദുനിയ വിജയ്, വരലക്ഷ്മി ശരത്കുമാർ, ചന്ദ്രിക രവി തുടങ്ങിയവർ വേഷമിടുന്ന ഈ ചിത്രം ബാലയ്യ ആരാധകരെ ലക്‌ഷ്യം വെച്ചൊരുക്കിയ ഒരു മാസ്സ് ആക്ഷൻ ത്രില്ലറാണെന്നാണ് സൂചന. ഈ ചിത്രത്തിന് ക്യാമറ ചലിപ്പിക്കുന്നത് ഋഷി പഞ്ചാബി, എഡിറ്റ് ചെയ്യുന്നത് നവീൻ നൂലി എന്നിവരാണ്. വെങ്കട്, റാം- ലക്ഷ്മൺ ടീം എന്നിവരാണ് ഈ ചിത്രത്തിന് വേണ്ടി സംഘട്ടനം ഒരുക്കുന്നത്. മലയാളി താരം ഹണി റോസും ഇതിന്റെ താരനിരയിലുണ്ട്. പ്രശസ്ത എഴുത്തുകാരൻ സായ് മാധവ് ബുറ സംഭാഷണങ്ങൾ രചിച്ച ചിത്രം കൂടിയാണ് വീരസിംഹ റെഡ്ഢി.