സ്വന്തം സിനിമ കണ്ട് പൊട്ടിക്കരഞ്ഞ് പ്രിയ വാര്യർ; വീഡിയോ കാണാം

യുവതാരങ്ങളെ കേന്ദ്ര കഥാപാത്രങ്ങളാക്കി പ്രശസ്ത സംവിധായകൻ രഞ്ജിത് ശങ്കർ സംവിധാനം ചെയ്ത 4 ഇയേഴ്സ് എന്ന ചിത്രം ഇന്ന് പ്രേക്ഷകരുടെ മുന്നിലെത്തി. ക്യാമ്പസ് സൗഹൃദവും പ്രണയവും പ്രമേയമാക്കി രഞ്ജിത് ശങ്കര്‍ ഒരുക്കിയ ഈ ചിത്രം, ഡ്രീംസ് ആന്റ് ബിയോണ്ടിന്റെ ബാനറില്‍ രഞ്ജിത് ശങ്കറും ജയസൂര്യയും ചേര്‍ന്നാണ് നിർമ്മിച്ചിരിക്കുന്നത്. സർജാനോ ഖാലിദ്, പ്രിയ പ്രകാശ് വാര്യർ എന്നിവർ പ്രധാന വേഷങ്ങൾ ചെയ്ത ഈ ചിത്രത്തിന്റെ പ്രിവ്യൂ ഷോ കൊച്ചിയിൽ നടന്നിരുന്നു. ആ ഷോ കണ്ട് പൊട്ടിക്കരഞ്ഞു കൊണ്ടാണ് നായികാ വേഷം ചെയ്ത പ്രിയ പ്രകാശ് വാര്യർ തീയേറ്ററിൽ നിന്ന് പുറത്ത് വന്നത്. കരച്ചിലടക്കാന്‍ പാടുപെട്ട പ്രിയയെ ചിത്രത്തിലെ നായകനായ സര്‍ജാനോ ഖാലിദ് ആശ്വസിപ്പിക്കുന്നതും വീഡിയോയിൽ നമ്മുക്ക് കാണാൻ സാധിക്കും. കുട്ടിക്കാലം മുതലുള്ള തന്റെ സ്വപ്‌നമാണ് ഈ ചിത്രം സാക്ഷാത്കരിച്ചതെന്നു പറഞ്ഞ പ്രിയ, തന്റെ ജീവിതത്തോട് അടുത്തു നില്‍ക്കുന്നതാണ് ഈ ചിത്രത്തിലെ ഗായത്രി എന്ന കഥാപാത്രമെന്നും പറഞ്ഞു.

എല്ലാവര്‍ക്കും വൈകാരികമായി ഏറെ കണക്ട് ആകുന്ന ചിത്രമാണ് ഇതെന്നും, അതിന്റെ ഏറ്റവും വലിയ തെളിവാണ് പ്രിയയുടെ പ്രതികരണമെന്ന് നായകനായ സർജാനോ ഖാലിദ് പറയുന്നു. സർജാനോ ഖാലിദ് വിശാൽ എന്ന കഥാപാത്രത്തിന് ജീവൻ നൽകുന്ന ഈ ചിത്രം ക്യാമ്പസിൽ നാല് വർഷം ഒരുമിച്ച് ചിലവഴിക്കുന്ന പ്രണയജോഡികളുടെ കഥയാണ് പറയുന്നത്. രഞ്ജിത് ശങ്കർ ഒരുക്കിയ പതിനാലാമത്തെ ചിത്രമാണ് ഇത്. അദ്ദേഹത്തിന്റെ ആദ്യത്തെ U/A സർട്ടിഫിക്കറ്റ് ചിത്രമെന്ന പ്രത്യേകതയും ഇതിനുണ്ട്. സംവിധായകൻ തന്നെ തിരക്കഥയും രചിച്ച ഈ ചിത്രത്തിന്റെ ഒരു ഗാനത്തിന്റെ വരികളും അദ്ദേഹമാണ് രചിച്ചത്. സാലു കെ. തോമസ് ക്യാമറ ചലിപ്പിച്ച ഈ ചിത്രത്തിന് സംഗീത സംവിധാനം നിർവഹിച്ചത് ശങ്കർ ശർമയാണ്.