കമ്മാര സംഭവത്തിന്റെ രണ്ടാം ഭാഗം: മുരളി ഗോപി പറയുന്നു

ജനപ്രിയ നായകൻ ദിലീപ് നായകനായി 2018 ഇൽ റിലീസ് ചെയ്ത ചിത്രമാണ് കമ്മാര സംഭവം. നവാഗതനായ രതീഷ് അമ്പാട്ട് സംവിധാനം ചെയ്ത ഈ ചിത്രം രചിച്ചത് മുരളി ഗോപിയാണ്. റിലീസ് ചെയ്ത സമയത്ത് തീയേറ്ററുകളിൽ വലിയ വിജയം നേടാൻ സാധിച്ചില്ലെങ്കിലും പിന്നീട് ടെലിവിഷനിലൂടെയും മറ്റും വലിയ ആരാധകവൃന്ദമാണ് ഈ ചിത്രത്തിനുണ്ടായത്. ചരിത്രം വളച്ചൊടിച്ചു കഥകളുണ്ടാക്കുന്നതിനെയെല്ലാം വളരെ രസകരമായി വിമർശിച്ച ഈ ചിത്രത്തിന്റെ മേക്കിങ്, രചന രീതി, ഇതിലെ അഭിനേതാക്കളുടെ പ്രകടനം എന്നിവയെല്ലാം വലിയ പ്രേക്ഷക ശ്രദ്ധ നേടി. ഇപ്പോഴിതാ, ഈ ചിത്രത്തിന് ഒരു രണ്ടാം ഭാഗമുണ്ടാകാനുള്ള സാധ്യതയുണ്ടെന്നും അങ്ങനെയൊരു രണ്ടാം ഭാഗത്തിന്റെ കഥ മനസ്സിലുണ്ടെന്നും വെളിപ്പെടുത്തുകയാണ് മുരളി ഗോപി. ക്ലബ് എഫ് എമ്മിന് നൽകിയ അഭിമുഖത്തിലാണ് മുരളി ഗോപി ഇത് പറഞ്ഞത്. ആ രണ്ടാം ഭാഗം സംഭവിക്കുമോ എന്ന് തനിക്കറിയില്ലായെന്നും അത് കണ്ടറിയണമെന്നും മുരളി ഗോപി കൂട്ടിച്ചേർക്കുന്നുണ്ട്.

രണ്ട് ഭാഗമായിട്ടാണ് ആദ്യം തന്നെ ഈ ചിത്രം മനസ്സിലുണ്ടായിരുന്നതെന്നും മുരളി ഗോപി കൂട്ടിച്ചേർക്കുന്നുണ്ട്. മോഹൻലാൽ നായകനായ എംപുരാൻ ആണ് ഇനി മുരളി ഗോപി രചിച്ചു ചിത്രീകരണം ആരംഭിക്കാൻ പോകുന്ന ചിത്രം. ലൂസിഫറിന്റെ രണ്ടാം ഭാഗമായ ഈ ചിത്രത്തിന് ശേഷം പൃഥ്വിരാജ് നായകനായ പാൻ ഇന്ത്യൻ ചിത്രം ടൈസൺ, മോഹൻലാൽ തന്നെ നായകനായ ലൂസിഫർ മൂന്നാം ഭാഗമെന്നിവയും മുരളി ഗോപി രചിക്കും. അദ്ദേഹം രചിച്ച തീർപ്പ് എന്ന ചിത്രം ഇപ്പോൾ റിലീസിനൊരുങ്ങി നിൽക്കുകയാണ്. പൃഥ്വിരാജ്, ഇന്ദ്രജിത്, എന്നിവർ വേഷമിട്ടിരിക്കുന്ന ഈ ചിത്രം രതീഷ് അമ്പാട്ടാണ് സംവിധാനം ചെയ്തിരിക്കുന്നത്.