വീണ്ടും മാസ്സ് പോലീസ് വേഷത്തിൽ മെഗാ സ്റ്റാർ മമ്മൂട്ടി

മലയാളത്തിന്റെ മെഗാ സ്റ്റാർ മമ്മൂട്ടി വീണ്ടും പോലീസ് വേഷം ചെയ്യാൻ പോവുകയാണെന്ന റിപ്പോർട്ടുകളാണ് ഇപ്പോൾ വരുന്നത്. നിസാം ബഷീർ സംവിധാനം ചെയ്യുന്ന റോഷാക് ഈ മാസം പൂർത്തിയാക്കുന്ന മമ്മൂട്ടി ഇനി ജോയിൻ ചെയ്യാൻ പോകുന്നത് ഉദയ കൃഷ്ണ രചിച്ച്, ബി ഉണ്ണികൃഷ്ണൻ സംവിധാനം ചെയ്യാൻ പോകുന്ന ബിഗ് ബഡ്ജറ്റ് ചിത്രത്തിലാണെന്നാണ് സൂചന. ജൂലൈ രണ്ടാം വാരമാണ് ഈ ചിത്രത്തിന്റെ ഷൂട്ടിങ് ആരംഭിക്കുകയെന്നും, ഇതിൽ മമ്മൂട്ടി ഒരു മാസ്സ് പോലീസ് ഓഫീസറായാണ് അഭിനയിക്കുന്നതെന്നുമാണ് വാർത്തകൾ പറയുന്നത്. ഒരു ഇൻവെസ്റ്റിഗേഷൻ ത്രില്ലറായാവും ഈ ചിത്രമൊരുക്കുകയെന്നും, യഥാർത്ഥത്തിൽ നടന്ന ഒരു സംഭവത്തെ ആസ്പദമാക്കിയാവും ഈ ചിത്രമൊരുക്കുകയെന്നും നേരത്തെ ബി ഉണ്ണികൃഷ്ണൻ പറഞ്ഞിരുന്നു. വമ്പൻ ബഡ്ജറ്റിലൊരുക്കുന്ന ഈ ചിത്രം മലയാളം കൂടാതെ തമിഴ്, ഹിന്ദി, തെലുങ്കു, കന്നഡ ഭാഷകളിലും ഡബ്ബ് ചെയ്തു റിലീസ് ചെയ്യാനും പ്ലാനുണ്ട്.

മമ്മൂട്ടിയെ കൂടാതെ വലിയ താരനിരയാണ് ഈ ചിത്രത്തിൽ അണിനിരക്കുന്നതെന്നും സൂചനയുണ്ട്. മലയാളത്തിൽ നിന്ന് മഞ്ജു വാര്യർ, ബിജു മേനോൻ എന്നിവർ ഇതിന്റെ ഭാഗമാകുമെന്ന് നേരത്തെ വാർത്തകൾ വന്നിരുന്നു. ഇവരെ കൂടാതെ മറ്റു ഭാഷകളിൽ നിന്നും ഇതിൽ താരങ്ങളുണ്ടാകുമെന്നും ഇപ്പോൾ വരുന്ന റിപ്പോർട്ടുകൾ സൂചിപ്പിക്കുന്നു. ഈ അടുത്തകാലത്ത് മമ്മൂട്ടിയഭിനയിച്ചിട്ടുള്ളതിൽ ഏറ്റവും കൂടുതൽ മുതൽ മുടക്കുള്ള ചിത്രമായിരിക്കും ഈ ബി ഉണ്ണികൃഷ്ണൻ- ഉദയ കൃഷ്ണ ചിത്രമെന്നാണ് സൂചന. ഇനി മമ്മൂട്ടിയഭിനയിച്ചു റിലീസ് ചെയ്യാനുള്ളത് ലിജോ ജോസ് പെല്ലിശ്ശേരി സംവിധാനം ചെയ്ത നൻ പകൽ നേരത്തു മയക്കം, നിസാം ബഷീർ സംവിധാനം ചെയ്ത റോഷാക്ക് എന്നിവയാണ്. ഈ രണ്ടു ചിത്രങ്ങളും മമ്മൂട്ടി കമ്പനിയുടെ ബാനറിൽ മമ്മൂട്ടി തന്നെയാണ് നിർമ്മിക്കുന്നത്.