സായി പല്ലവിയുടെ തകർപ്പൻ പ്രകടനം; നാനി നായകനായ ശ്യാം സിംഗ റോയ്‌ക്ക്‌ വൻ വരവേൽപ്പ്..!

തെലുങ്കിൽ തീയേറ്റർ റിലീസ് ചെയ്തു ഹിറ്റായി മാറിയ നാനി ചിത്രമായ ശ്യാം സിംഗ റോയ് ഇപ്പോൾ ഒടിടി പ്ലാറ്റ്‌ഫോമിലും സ്ട്രീമിങ് ആരംഭിച്ചു കഴിഞ്ഞു. ഈ കഴിഞ്ഞ ജനുവരി ഇരുപത്തിയൊന്നിന് നെറ്റ്ഫ്ലിക്സിൽ റിലീസ് ചെയ്ത ഈ ചിത്രത്തിന് ഇപ്പോൾ വമ്പൻ അഭിപ്രായം ആണ് ലഭിക്കുന്നത്. മികച്ച പ്രേക്ഷക പ്രതികരണവും നിരൂപക പ്രശംസയും നേടുന്ന ഈ ചിത്രം ഒരു പീരീഡ് ഡ്രാമ ആയാണ് ഒരുക്കിയിരിക്കുന്നത്. നാനിക്കൊപ്പം സായ് പല്ലവി, മഡോണ സെബാസ്റ്റ്യൻ, കൃതി ഷെട്ടി എന്നിവരും അഭിനയിക്കുന്ന ഈ ചിത്രം ചരിത്രവുമായി ബന്ധപ്പെട്ട കഥയും അവതരണവും കൊണ്ടാണ് ശ്രദ്ധ നേടുന്നത്. അതിനൊപ്പം ആവേശം നിറക്കുന്ന ആക്ഷൻ രംഗങ്ങളും പ്രണയവും കഥയും കൊണ്ട് കൂടി ഈ സിനിമ കയ്യടി നേടുന്നുണ്ട്. നായകനായ നാനി ഗംഭീര പ്രകടനമാണ് കാഴ്ച വെച്ചിരിക്കുന്നത് എങ്കിലും, ഏറ്റവും കൂടുതൽ ശ്രദ്ധ നേടുന്നത് സായി പല്ലവി നടത്തിയ പ്രകടനമാണ്.

1970 കളിലെ കൊൽക്കത്ത നഗരവും ആ സമയത്തു ഇന്ത്യയിൽ നിലനിന്നിരുന്ന തൊട്ടുകൂടായ്മ, തീണ്ടിക്കൂടായ്മ ജാതി വേർതിരിവ്, ദേവദാസി സമ്പ്രദായം, കുടിപ്പക, ചതി എന്നിവയൊക്കെ ഈ ചിത്രത്തിന്റെ പ്രമേയത്തിന്റെ ഭാഗമാണ്. നാനി ഇരട്ട വേഷത്തിലാണ് ഈ ചിത്രത്തിൽ അഭിനയിച്ചിരിക്കുന്നത്. ശ്യാം സിങ്ക റോയ് എന്ന കേന്ദ്രകഥാപാത്രമായും അദ്ദേഹത്തിന്റെ പുനർജന്മമായ വാസുവായും നാനി എത്തുമ്പോൾ ദേവദാസി കഥാപാത്രമായാണ് സായി പല്ലവി എത്തിയിരിക്കുന്നത്. സൂപ്പർ ഹിറ്റ് തെലുങ്കു സംവിധായകൻ രാഹുൽ സങ്കൃത്യനാണ് ഈ ചിത്രത്തിന്റെ തിരക്കഥയും സംവിധാനവും നിർവഹിച്ചിരിക്കുന്നത്. സായ് പല്ലവിയുടെ ഗംഭീര നൃത്തരംഗങ്ങളും നാനിയുടെ ആക്ഷൻ രംഗങ്ങളുമാണ് ഈ ചിത്രത്തിന്റെ ഏറ്റവും വലിയ രണ്ടു ആകർഷണ ഘടകങ്ങൾ എന്ന് പറയാം. ഏതായാലും സാധാരണ കണ്ടു വരുന്ന തെലുങ്കു ചിത്രങ്ങളിൽ നിന്നെല്ലാം വ്യത്യസ്തമായി, അതിമനോഹരമായി കഥ പറയുന്ന ഒരു ഗംഭീര ചിത്രമാണ് ശ്യാം സിംഗ റോയ് എന്ന് പറയാം.