സിനിമയോടുള്ള നിങ്ങളുടെ ഇഷ്ടം കന്നഡ സിനിമയെ കൂടുതൽ സമ്പന്നമാകട്ടെ; റിഷാബ് ഷെട്ടിക്ക് നന്ദി പറഞ്ഞു യാഷ്

കന്നഡ സിനിമയിലെ ഏറ്റവും വലിയ താരങ്ങളിൽ ഒരാളായ റോക്കിങ് സ്റ്റാർ യാഷ് ഏതാനും ദിവസങ്ങൾക്ക് മുൻപാണ് തന്റെ ജന്മദിനം ആഘോഷിച്ചത്. അന്ന് അദ്ദേഹത്തിന് ആശംസകളുമായി ഒട്ടേറെ സിനിമാ പ്രവർത്തകർ രംഗത്ത് വന്നിരുന്നു. അതിലൊന്ന് കന്നഡയിലെ മറ്റൊരു താരമായ റിഷാബ് ഷെട്ടിയുടേതായിരുന്നു. യാഷ് എന്ന വ്യക്തിയുടെ കഠിനാധ്വാനവും മുന്നോട്ടുള്ള യാത്രയും തങ്ങളെ പോലുള്ളവർക്ക് വലിയ പ്രചോദനം ആണെന്നാണ് റിഷാബ് ഷെട്ടി കുറിച്ചത്. ഇനിയും ഒട്ടേറെ ചിത്രങ്ങളിൽ ഒട്ടേറെ മികച്ച കഥാപാത്രങ്ങളായി യാഷിനെ കാണാൻ സാധിക്കട്ടെ എന്നും പറഞ്ഞു കൊണ്ടാണ് അദ്ദേഹം ജന്മദിന ആശംസകൾ നേർന്നത്. ഇപ്പോഴിതാ റിഷാബ് ഷെട്ടിക്ക് നന്ദി പറഞ്ഞു കൊണ്ട് രംഗത്ത് വന്നിരിക്കുകയാണ് യാഷ്. റിഷാബ് ഷെട്ടി എന്ന പ്രതിഭക്ക് സിനിമയോടുള്ള ഇഷ്ടം കന്നഡ സിനിമയെ കൂടുതൽ സമ്പന്നമാക്കട്ടെ എന്നാണ് യാഷ് കുറിച്ചത്.

നടനായും സംവിധായകനായും രചയിതാവായുമെല്ലാം വലിയ കയ്യടി നേടുന്ന താരമാണ് റിഷാബ് ഷെട്ടി. യാഷിനെ വമ്പൻ താരമാക്കിയ പ്രശാന്ത് നീൽ ചിത്രം കെ ജി എഫ്, കെ ജി എഫ് 2 എന്നിവ നിർമ്മിച്ച ഹോംബാലെ ഫിലിംസ് തന്നെയാണ് ഈ അടുത്തിടെ ഇന്ത്യ മുഴുവൻ തരംഗമായ റിഷാബ് ഷെട്ടി ചിത്രം കാന്താരയും നിർമ്മിച്ചത്. ഏതായാലും ഹോംബാലെ ഫിലിംസ് കെ ജി എഫ് സീരിസ് ഒട്ടേറെ ഭാഗങ്ങളിലൂടെ മുന്നോട്ടു കൊണ്ട് പോകും എന്ന് പ്രഖ്യാപിച്ചതോടെ, റിഷാബ് ഷെട്ടിയും കെ ജി എഫ് ഫ്രാഞ്ചൈസിന്റെ ഭാഗമാകുമോ എന്നറിയാനുള്ള ആകാംക്ഷയിലാണ് ആരാധകർ. കാരണം, കെ ജി എഫ് ആദ്യ അഞ്ച് ഭാഗങ്ങൾക്ക് ശേഷം റോക്കി ഭായ് എന്ന കഥാപാത്രത്തെ അവതരിപ്പിക്കാൻ യാഷിന് പകരം മറ്റ് നടന്മാരെ കൊണ്ട് വരാൻ പ്ലാൻ ഉണ്ടെന്നു ഹോംബാലെ ഫിലിംസ് മേധാവി വ്യക്തമാക്കിയിരുന്നു.