പാർവതി സംവിധാനം ചെയ്യുന്ന സിനിമയ്ക്കു തിരക്കഥ ഒരുക്കാൻ റിമ കല്ലിങ്കൽ..!

പ്രശസ്ത നടിയായ പാർവതി കുറച്ചു നാള് മുൻപാണ് ഒരു സംവിധായിക ആവാനുള്ള തന്റെ ആഗ്രഹം തുറന്നു പറഞ്ഞത്. അധികം വൈകാതെ അത് സംഭവിക്കും എന്ന പ്രതീക്ഷയും പാർവതി പങ്കു വെച്ചിരുന്നു. എന്നാൽ ഇപ്പോൾ പാർവതിയുടെ അടുത്ത സുഹൃത്തും നടിയുമായ റിമ കല്ലിങ്കലും തന്റെ സംവിധാന മോഹവും രചനാ മോഹവും തുറന്നു പറഞ്ഞിരിക്കുകയാണ്. ഒരു രചയിതാവും സംവിധായികയും ആവുകയാണ് തന്റെ ലൈഫിലെ അടുത്ത സ്റ്റേജ് എന്ന് റിമ പറയുന്നു. താൻ രചിച്ചു സ്വന്തമായി സംവിധാനം ചെയ്യുക മാത്രമല്ല ലക്‌ഷ്യം എന്നും റിമ പറയുന്നു. ചിലപ്പോൾ തന്റെ രചന താൻ പാർവതിയെ കൊണ്ടാവും സംവിധാനം ചെയ്യിക്കുക എന്നാണ് റിമ കല്ലിങ്കൽ പറയുന്നത്. തന്റെ രചനയിൽ പാർവതി സംവിധാനം ചെയ്യുന്ന ഒരു ചിത്രം പ്രതീക്ഷിക്കാം എന്നും റിമ പറഞ്ഞു.

റിമയുടെ ഭർത്താവായ ആഷിക് അബു മലയാള സിനിമയിലെ മികച്ച സംവിധായകരിൽ ഒരാൾ ആണ്. ഇപ്പോൾ റിമ നിർമ്മിച്ച് ആഷിക് അബു സംവിധാനം ചെയ്ത വൈറസ് എന്ന ചിത്രം നിറഞ്ഞ സദസ്സിൽ പ്രദർശനം തുടരുകയാണ്. ഈ ചിത്രത്തിൽ റിമയും പാർവതിയും മുഖ്യ വേഷങ്ങളിൽ അഭിനയിച്ചിട്ടും ഉണ്ട്. മലയാള സിനിമയിലെ സ്ത്രീകൾക്ക് വേണ്ടിയുള്ള സംഘടനയായ ഡബ്ള്യു സി സിയുടെ തലപ്പത്തു ഉള്ളവരാണ് റിമ കല്ലിങ്കലും പാർവതി തിരുവോതും. ഇവർ രണ്ടു പേരും തമ്മിലുള്ള സൗഹൃദം സിനിമ രംഗത്തും പുറത്തേക്കും നീളുന്ന ഒന്നാണ്. ഏതായാലും മലയാള സിനിമയിലെ ഏറ്റവും മികച്ച രണ്ടു നടിമാർ എന്ന നിലയിലും സ്ത്രീപക്ഷ വാദികൾ എന്ന നിലയിലും പ്രശസ്തരായ റിമയും പാർവതിയും ചേർന്നൊരുക്കുന്ന ചിത്രത്തിനായി കാത്തിരിക്കാം നമ്മുക്ക്.