അങ്ങനെ ആ സൂപ്പർ ഹിറ്റ് ഡയലോഗും സിനിമാ പേരായി മാറി ; രസികൻ പേരുമായി രാഹുൽ മാധവ് ചിത്രം റിലീസിന് ഒരുങ്ങുന്നു..!

രാജസേനൻ- ജയറാം കൂട്ടുകെട്ടിൽ പുറത്തിറങ്ങിയ മേലേപ്പറമ്പിൽ ആൺവീട് എന്ന ചിത്രം ഇന്നും പ്രേക്ഷകർ മറന്നിട്ടില്ല. സൂപ്പർ ഹിറ്റ് വിജയം നേടിയ ഈ ഫാമിലി കോമഡി ചിത്രത്തിലെ ഓരോ കഥാപാത്രങ്ങളും ഓരോ കോമഡി ഡയലോഗുകളും പ്രേക്ഷകർക്ക് ഇന്നും കാണാപാഠം ആണ്. ആ ചിത്രത്തിൽ ജഗതി ചേട്ടൻ അവതരിപ്പിച്ച കഥാപാത്രം പറയുന്ന ഒരു സൂപ്പർ ഡയലോഗ് ആണ് വേലക്കാരിയായിരുന്നാലും നീയെൻ മോഹവല്ലി എന്നത്. ഇപ്പോഴിതാ മലയാളികളെ കുടുകുടാ ചിരിപ്പിച്ച ആ ഡയലോഗ് ടൈറ്റിൽ ആക്കിയ ഒരു ചിത്രം തിയേറ്ററിൽ എത്തുകയാണ്. യുവ താരമായ രാഹുൽ മാധവ് നായകൻ ആയി എത്തുന്ന ഈ ചിത്രം സംവിധാനം ചെയ്തിരിക്കുന്നത് നവാഗതനായ ഗോവിന്ദ് വരാഹ ആണ്. അദ്ദേഹം തന്നെ രചനയും നിർവഹിച്ചിരിക്കുന്ന ഈ ചിത്രം ജി വി ആർ പ്രൊഡക്ഷൻസിന്റെ ബാനറിൽ ജി രാജു ബാബു ആണ് നിർമ്മിച്ചിരിക്കുന്നത്. ശ്രവ്യ നായികയായെത്തുന്ന ഈ ചിത്രം ഒരു പ്രണയ ചിത്രവും അതുപോലെ തന്നെ ഒരു ഫാമിലി എന്റെർറ്റൈനെറുമാണ്.

പ്രശസ്ത താരങ്ങളായ മധു, റിസ ബാവ, നീന കുറുപ്പ്, അസീസ്, പ്രശാന്ത് അലക്സാണ്ടർ, ഗായത്രി മയൂര, ദിശിനി, ദിലീപ്, അർജുൻ എന്നിവരും അഭിനയിച്ചിരിക്കുന്ന ഈ ചിത്രത്തിന് ദൃശ്യങ്ങൾ ഒരുക്കിയത് കൃഷ്ണ സാഗർ ആണ്. പ്രശസ്ത എഡിറ്റർ സിയാൻ ശ്രീകാന്ത് ആണ് ഈ ചിത്രം എഡിറ്റ് ചെയ്തിരിക്കുന്നത്. മാർച്ച് മാസത്തിൽ ഈ ചിത്രം തീയേറ്ററുകളിൽ എത്തുമെന്നാണ് ഇപ്പോൾ വരുന്ന റിപ്പോർട്ടുകൾ പറയുന്നത്. വിശ്വജിത് സംഗീതം ഒരുക്കിയിരിക്കുന്ന ഈ ചിത്രത്തിന് സംഭാഷണങ്ങൾ രചിച്ചത് മുരളി കൃഷ്ണ, പ്രശാന്ത് അലക്സാണ്ടർ എന്നിവർ ചേർന്നാണ്. ഒരു പെൺകുട്ടിയുടെ ജീവിതം പ്രണയത്തിനു മുൻപും അതിനു ശേഷവും എങ്ങനെ ആണെന്ന് ഈ ചിത്രത്തിലൂടെ വരച്ചു കാണിക്കാൻ ശ്രമിച്ചിരിക്കുന്നു എന്നാണ് അണിയറ പ്രവർത്തകർ പറയുന്നത്. ഇന്നത്തെ കാലത്തിന്റെ ഒരു കരുതലാണ് ഈ ചിത്രം എന്നും അവർ പറയുന്നു. പ്രണയിച്ചു ഒളിച്ചോടി പോകേണ്ടി വരുന്ന ഒരു പെൺകുട്ടിയുടെ ജീവിതത്തിൽ അവൾ നേരിടേണ്ടി വരുന്ന സാഹചര്യങ്ങൾ, കുടുംബ ബന്ധങ്ങളുടെ പശ്ചാത്തലത്തിൽ ഈ ചിത്രത്തിൽ അവതരിപ്പിച്ചിരിക്കുന്നു എന്നാണ് സൂചന.