ശക്തമായ കഥാപാത്രവുമായി ഇന്ദ്രൻസ് വീണ്ടും; കിണർ റിലീസിന് ഒരുങ്ങുന്നു..!

പ്രശസ്ത നടനായ ഇന്ദ്രൻസ് ഇപ്പോൾ ഗംഭീരമായ പ്രകടനങ്ങൾ കൊണ്ട് നമ്മളെ വിസ്മയിപ്പിക്കുന്ന കാലമാണ്. കലാമൂല്യമുള്ള ഒട്ടേറെ ചിത്രങ്ങളിൽ ശകത്മായ കഥാപാത്രങ്ങളെ അവതരിപ്പിക്കുന്ന അദ്ദേഹം മറ്റൊരു മികച്ച കഥാപാത്രവുമായി എത്തുന്ന ചിത്രമാണ് എം എ നിഷാദ് സംവിധാനം ചെയ്ത കിണർ. കെണി എന്ന പേരിൽ തമിഴിലും ഒരുക്കിയിരിക്കുന്ന ഈ ചിത്രം അധികം വൈകാതെ തന്നെ തീയേറ്ററുകളിൽ എത്തും. ജയപ്രദ നായികാ വേഷത്തിൽ എത്തുന്ന ഈ ചിത്രത്തിൽ വളരെ നിർണ്ണായകവും അതുപോലെ ശ്കതവുമായ വേഷവുമാണ് ഇന്ദ്രൻസ് ചെയ്യുന്നത് എന്നാണ് സൂചന. ഇന്ദ്രൻസ് എന്ന മികച്ച നടനെ ഉപയോഗിച്ചിരിക്കുന്ന ഒരു മികച്ച കഥാപാത്രമാണ് ഈ ചിത്രത്തിലേതു എന്നാണ് റിപ്പോർട്ടുകൾ വരുന്നത്. അദ്ദേഹത്തിന്റെ അഭിനയ ജീവിതത്തിലെ മികച്ച കഥാപാത്രങ്ങളുടെ കൂട്ടത്തിൽ പെടുത്താവുന്ന ഒന്നായി കിണറിലെ ഈ വേഷം മാറും എന്നാണ് റിപ്പോർട്ടുകൾ പറയുന്നത്. ജലക്ഷാമം അടിസ്ഥാനപ്പെടുത്തിയാണ് ഈ ചിത്രം കഥ പറയുന്നത്.

എം എ നിഷാദ് തന്നെ കഥ എഴുതിയ ഈ ചിത്രത്തിന് തിരക്കഥ ഒരുക്കിയത് അൻവർ അബ്ദുല്ല, അജു നാരായണൻ എന്നിവർ ചേർന്ന് ആണ്. ഫ്രാഗ്രൻറ് നേച്ചർ ഫിലിം ക്രീയേഷന്സിന്റെ ബാനറിൽ സജീവ് പി കെ , ആനി സജീവ് എന്നിവർചേർന്ന് നിർമ്മിച്ചിരിക്കുന്ന ഈ ചിത്രത്തിൽ ജയപ്രദക്കും ഇന്ദ്രൻസിനും പുറമെ രേവതി, പശുപതി, പാർത്ഥിപൻ, അർച്ചന, നാസ്സർ, പാർവതി നമ്പ്യാർ, രഞ്ജി പണിക്കർ, ജോയ് മാത്യു, ഭഗത് മാനുവൽ, സുനിൽ സുഗത, അനിൽ നെടുമങ്ങാട്, പി ബാലചന്ദ്രൻ, സുധീർ കരമന, സോഹൻ സീനുലാൽ എന്നിവരും വേഷമിട്ടിരിക്കുന്നു . ഇന്ദിര എന്ന കഥാപാത്രത്തെയാണ് ജയപ്രദ ഈ ചിത്രത്തിൽ അവതരിപ്പിക്കുന്നത്. പ്രണയം എന്ന മോഹൻലാൽ ചിത്രത്തിൽ അഭിനയിച്ചതിന് ശേഷം ജയപ്രദ മലയാളത്തിലേക്ക് മടങ്ങിയെത്തുന്ന ചിത്രം കൂടിയാണ് കിണർ.