രണം പരാജയമെന്ന് പൃഥ്വിരാജ് ; സിനിമ സ്റ്റൈൽ മാസ്സ് മറുപടിയുമായി റഹ്മാൻ..

ഈ അടുത്തിടെയാണ് കൂടെ എന്ന സിനിമയുടെ വിജയത്തിന്റെ ഭാഗമായി പൃഥ്‌വിരാജിന്റെ കൂടെ എന്ന ഒരു മാധ്യമ മുഖാമുഖം പൃഥ്വിരാജ് സുകുമാരൻ നടത്തിയത്. അതിൽ പൃഥ്വിരാജ് നടത്തിയ ഒരു പരാമർശം ഏറെ ശ്രദ്ധ നേടിയിരുന്നു. പരാജയമാകുമെന്നു അറിഞ്ഞു കൊണ്ട് തന്നെയാണ് പരീക്ഷണ ചിത്രങ്ങൾ ചെയ്യുന്നതെന്നും അതിൽ കൂടെ പോലുള്ള ചിലതു വിജയിക്കുമ്പോൾ രണം പോലെ ചിലതു പരാജയപ്പെടുമെന്നും പൃഥ്വിരാജ് പറഞ്ഞു. എന്നാൽ ഇപ്പോൾ അതിനെതിരെ മറുപടിയുമായി രണത്തിന്റെ നിർമ്മാതാവ് ബിജു ലോസണും അതുപോലെ തന്നെ രണത്തിൽ അഭിനയിച്ച പ്രശസ്ത നടൻ റഹ്മാനും രംഗത്ത് വന്നിരിക്കുകയാണ്. രണം ഇപ്പോഴും തീയേറ്ററുകളിൽ തുടരുമ്പോൾ അത് പരാജയമാണെന്ന് പൃഥ്വിരാജ് പറഞ്ഞതാണ് ഇപ്പോൾ വിവാദമായത്.

പരാജയപ്പെടുമെന്ന് അറിഞ്ഞു കൊണ്ട് പരീക്ഷണ ചിത്രങ്ങൾ ചെയ്യുമ്പോൾ അതിനു സ്വന്തമായി പണം മുടക്കുകയാണ് പൃഥ്വിരാജ് ചെയ്യേണ്ടതെന്ന് രണത്തിന്റെ നിർമ്മാതാവ് പറഞ്ഞപ്പോൾ, റഹ്മാൻ പറയുന്നത് വേറെ രീതിയിലാണ്. തന്റെ ഫേസ്ബുക് പോസ്റ്റിലൂടെയാണ് റഹ്മാൻ മറുപടി പറഞ്ഞത്. സൂപ്പർ ഹിറ്റ് മോഹൻലാൽ ചിത്രമായ രാജാവിന്റെ മകനിലെ മോഹൻലാലിൻറെ ഡയലോഗ് ഉപയോഗിച്ചായിരുന്നു റഹ്മാന്റെ മറുപടി. ഒരിക്കൽ രാജു മോൻ എന്നോട് ചോദിച്ചു അങ്കിളിന്റെ അച്ഛനാരാണെന്നു. ഞാൻ പറഞ്ഞു ഒരു രാജാവാണെന്നു. കിരീടവും ചെങ്കോലുമെല്ലാമുള്ള ഒരു രാജാവ്. ആ രാജാവിന്റെ മകനാണ് ഞാൻ. എനിക്കുള്ള സകലതും എനിക്ക് തന്ന സിനിമയെന്ന രാജാവിന്റെ മകൻ. അന്നും ഇന്നും. ദാമോദർ ഡിട്രോയിറ്റിലെ രാജാവായിരുന്നു. ആദി അയാൾക്ക്‌ സ്വന്തം അനുജനെ പോലെയായിരുന്നു. പക്ഷെ ഒടുവിൽ ആ അനുജന്റെ കുത്തേറ്റു തന്നെ ദാമോദർ വീണു. പൃഥ്‌വിരാജിന്റെ പേര് എടുത്തു പറയാതെയാണ് റഹ്മാൻ അദ്ദേഹത്തിന് മറുപടി കൊടുത്തിരിക്കുന്നതു.