മരക്കാർ അറബിക്കടലിന്റെ സിംഹത്തിൽ നായികയായി കീർത്തി സുരേഷ് എത്തിയേക്കും; ചർച്ചകൾ അവസാന ഘട്ടത്തിൽ..!

മോഹൻലാൽ- പ്രിയദർശൻ ചിത്രമായ മരക്കാർ അറബിക്കടലിന്റെ സിംഹം എന്ന ചിത്രം വരുന്ന നവംബർ മാസത്തിൽ ആരംഭിക്കും. നവംബർ പതിനഞ്ചിനു ചിത്രീകരവും തുടങ്ങാൻ പ്ലാൻ ചെയ്യുന്ന ഈ ചിത്രത്തിന്റെ താര നിര ഓരോ ദിവസവും വലുതാവുകയാണ്. മോഹൻലാൽ നായകനായ ഈ ചിത്രത്തിൽ പ്രണവ് മോഹൻലാൽ, മധു, തമിഴ് നടന്മാരായ അർജുൻ, പ്രഭു, ബോളിവുഡ് താരം സുനിൽ ഷെട്ടി, മലയാള താരങ്ങളായ സിദ്ദിഖ്, രഞ്ജി പണിക്കർ, നെടുമുടി വേണു, ദുർഗാ കൃഷ്ണ എന്നിവരും എത്തും . ഇപ്പോൾ ലഭിക്കുന്ന വിവരങ്ങൾ പ്രകാരം ഈ ചിത്രത്തിലെ പ്രധാന സ്ത്രീ കഥാപാത്രത്തെ അവതരിപ്പിക്കാൻ എത്തുന്നത് കീർത്തി സുരേഷ് ആയിരിക്കും. കീർത്തിയുമായുള്ള ചർച്ചകൾ പുരോഗമിക്കുകയാണ് എന്നും കീർത്തിയുടെ ഡേറ്റ് ലഭിച്ചാൽ ഉടൻ തന്നെ ഒഫീഷ്യൽ പ്രഖ്യാപനം ഉണ്ടായേക്കും എന്നാണ് സൂചന.

മോഹൻലാൽ നായകനായ ഗീതാഞ്ജലി എന്ന പ്രിയദർശൻ ചിത്രത്തിലൂടെ ആണ് കീർത്തി മലയാളത്തിൽ അരങ്ങേറിയത്. അതിനു ശേഷം ദിലീപ് ചിത്രമായ റിങ് മാസ്റ്ററിലും കീർത്തി അഭിനയിച്ചു. പിന്നീട് തമിഴ്- തെലുങ്ക് ചിത്രങ്ങളിലേക്ക് കൂടു മാറിയ കീർത്തി, ഇപ്പോൾ തെന്നിന്ത്യൻ സിനിമയിലെ സൂപ്പർ നായികമാരിൽ ഒരാൾ ആണ്. തമിഴിലെയും തെലുങ്കിലെയും സൂപ്പർ താരങ്ങൾക്കൊപ്പം അഭിനയിച്ച കീർത്തിയുടെ മഹാനടി എന്ന തെലുങ്ക് ചിത്രത്തിലെ പ്രകടനം ദേശീയ തലത്തിൽ വരെ ശ്രദ്ധിക്കപ്പെട്ടിരുന്നു. മരക്കാറിൽ കീർത്തി ഉണ്ടെങ്കിൽ അത് മലയാളത്തിലേക്കുള്ള കീർത്തിയുടെ ഒരു മടങ്ങി വരവ് കൂടിയാവും. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ. കോൺഫിഡന്റ് ഗ്രൂപ്പ്ന്റെ ബാനറിൽ ഡോക്ടർ സി ജെ റോയ്, മൂൺഷോട്ട് എന്റെർറ്റൈന്മെന്റിന്റെ ബാനറിൽ സന്തോഷ് ടി കുരുവിള എന്നിവർ ചേർന്ന് നിർമ്മിക്കുന്ന ഈ ചിത്രം നൂറു കോടി രൂപ ബഡ്ജറ്റിൽ ആണ് ഒരുങ്ങുന്നത്.