സെറ്റ് ആക്കാം അണ്ണാ, തീ പാറും; ആന്റണി പെരുമ്പാവൂരിനു പൃഥ്വരാജ് സുകുമാരന്റെ മറുപടി..!

ഇന്ന് രാത്രി പന്ത്രണ്ടു മണി മുതലാണ് മോഹൻലാൽ- പൃഥ്വിരാജ് ടീം ഒന്നിക്കുന്ന ബ്രോ ഡാഡി എന്ന ചിത്രം ഡിസ്‌നി പ്ലസ് ഹോട്ട് സ്റ്റാർ വഴി സ്ട്രീം ചെയ്തു തുടങ്ങുന്നത്. ലൂസിഫറിന് ശേഷം പൃഥ്വിരാജ് ഒരുക്കിയ ഈ ചിത്രം ഒരു ഫാമിലി കോമഡി എന്റെർറ്റൈനെർ ആണ്. ശ്രീജിത്ത്, ബിബിൻ എന്നിവർ തിരക്കഥ രചിച്ച ഈ ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മിച്ചിരിക്കുന്നത്. ഇപ്പോഴിതാ റിലീസിന് മുൻപ് മോഹൻലാൽ, പൃഥ്വിരാജ്, ആന്റണി പെരുമ്പാവൂർ എന്നിവർ ട്വിറ്ററിൽ നടത്തിയ ഒരു രസകരമായ സംവാദമാണ് വൈറൽ ആവുന്നത്. ട്വീറ്റുകളും അതിനുള്ള മറുപടികളുമായാണ് ഇവരുടെ സംവാദം എത്തിയത്. ഈ ചിത്രത്തിൽ ആന്റണി ജോസഫ് എന്നൊരു പോലീസ് കഥാപാത്രമായി ആന്റണി പെരുമ്പാവൂർ എത്തുന്നുണ്ട്. അത് അവതരിപ്പിച്ചു കൊണ്ട് വളരെ രസകരമായ ഒരു സെല്ഫ് ട്രോൾ വീഡിയോ പൃഥ്വിരാജ് – ആന്റണി ടീം കുറച്ചു ദിവസം മുൻപ് പുറത്തു വിടുകയും, അത് സൂപ്പർ ഹിറ്റായി മാറുകയും ചെയ്തിരുന്നു.

ഇന്ന് മോഹൻലാൽ ബ്രോ ഡാഡി സ്ട്രീമിങ് അറിയിച്ചു കൊണ്ട് ട്വീറ്റ് ചെയ്തത്, ഈശോ കാറ്റാടിയെ പോലെ ഒരു മകൻ ഏതൊരു അപ്പന്റെയും സ്വപ്നം ആണെന്നും, താനിത് തമാശ ആയി പറയുന്നത് അല്ല എന്നുമാണ്. അതിനു മറുപടി ആയി പൃഥ്വിരാജ് കുറിച്ചത് ജോൺ കാറ്റാടിയിൽ നിന്നു ഇങ്ങനെ ഒരു അഭിനന്ദന വാക്ക് ഒരു സർപ്രൈസ് അല്ലെങ്കിൽ ഞെട്ടൽ ആണ് ഉണ്ടാക്കിയത് എന്നാണ്. അപ്പോഴാണ് തന്റെ പോലീസ് കഥാപാത്രത്തെ മാത്രം ആസ്‍പദമാക്കി മറ്റൊരു ചിത്രം ചെയ്യുന്ന കാര്യം എന്തായി എന്ന് ചോദിച്ചു ആന്റണി പെരുമ്പാവൂർ എത്തിയത്. സെറ്റ് ആക്കാം അണ്ണാ, തീ പാറും എന്നാണ് പൃഥ്വിരാജ് പറയുന്ന മറുപടി. അതിനൊപ്പം തന്നെ മോഹൻലാൽ- പൃഥ്വിരാജ് ടീം ചെയ്യുന്ന എംപുരാൻ എന്ന ചിത്രത്തിന്റെ ബഡ്ജറ്റിനെ കുറിച്ച് സംസാരിക്കാൻ ഒന്നൂടെ ഇരിക്കണം എന്നും പൃഥ്വിരാജ് രസകരമായി പറയുന്നുണ്ട്. ഏതായാലും പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ബ്രോ ഡാഡി.