പ്രണവും വിനീതും ഹൃദയം കീഴടക്കി; ശ്രദ്ധ നേടി സംവിധായകൻ അൻവർ റഷീദിന്റെ കുറിപ്പ്..!

പ്രണവ് മോഹൻലാൽ നായകനായി, വിനീത് ശ്രീനിവാസൻ രചിച്ചു സംവിധാനം ചെയ്ത ഹൃദയം ഇപ്പോൾ മഹാവിജയമാണ് നേടുന്നത്. ഈ അടുത്തകാലത്തെങ്ങും ഒരു മലയാള സിനിമയ്ക്കു ഇത്ര മികച്ച പ്രേക്ഷക- നിരൂപക പ്രശംസയും വരവേൽപ്പും നേടാൻ കഴിഞ്ഞിട്ടില്ല. കോവിഡ് നിയന്ത്രണങ്ങൾക്കിടയിലും അഭൂതപൂർവമായ ജനക്കൂട്ടമാണ് ഹൃദയം കാണാൻ തീയേറ്ററുകളിൽ എത്തുന്നത്. പ്രണവ് മോഹൻലാൽ നടത്തിയ ഗംഭീര പ്രകടനവും വിനീത് ശ്രീനിവാസന്റെ മനോഹരമായ തിരക്കഥയും സംവിധാനവുമാണ് ഈ ചിത്രത്തിന്റെ ഏറ്റവും വലിയ മികവ്. ഇവർക്കൊപ്പം ദർശന രാജേന്ദ്രൻ, കല്യാണി പ്രിയദർശൻ എന്നിവർ നടത്തിയ പ്രകടനവും ഹിഷാം അബ്ദുൽ വഹാബ് ഈണം നൽകിയ ഗാനങ്ങളും വലിയ കയ്യടിയാണ് നേടുന്നത്, അശ്വത് ലാൽ, ജോണി ആന്റണി എന്നിവരും വലിയ ശ്രദ്ധ നേടുന്നുണ്ട്. ഇപ്പോഴിതാ ഈ ചിത്രത്തേയും, പ്രണവ്, വിനീത് എന്നിവരേയും അഭിനന്ദിച്ചു കൊണ്ട് സംവിധായകൻ അൻവർ റഷീദ് കുറിച്ച വാക്കുകൾ ഏറെ ശ്രദ്ധ നേടുകയാണ്.

അദ്ദേഹം തന്റെ ഫേസ്ബുക് പേജിൽ കുറിച്ചത് ഇങ്ങനെ, ഹൃദയം കൊണ്ടെഴുതുന്ന കവിത, പ്രണയാമൃതം അതിൻ ഭാഷ -ശ്രീകുമാരൻ തമ്പി (സിനിമ – അക്ഷരത്തെറ്റ്). വിനീത് ശ്രീനിവാസന്റെ ഏറ്റവും മികച്ച സിനിമ. പ്രണവ് മോഹൻലാലിന്റെ കരിയർ ബെസ്റ്റ് പെർഫോമൻസ്. നട്ടെല്ലാവുന്ന സംഗീതം ഹെഷാം അബ്ദുൾ വഹാബ്. തീയേറ്ററുകൾക്ക് മെറിലാന്റ് സിനിമാസിന്റെ കൊറോണക്കാലത്തെ സമ്മാനം. ഹൃദയം A MUST WATCH. ഒരുപിടി ഗംഭീര ചിത്രങ്ങൾ മലയാള സിനിമാ പ്രേമികൾക്ക് സമ്മാനിച്ച അൻവർ റഷീദ് ഏറെ ആരാധകരുള്ള സംവിധായകനാണ്. അദ്ദേഹം കുറിച്ച ഈ വാക്കുകൾ ഹൃദയം ടീമിന് കിട്ടാവുന്ന ഏറ്റവും വലിയ അഭിനന്ദനങ്ങളിൽ ഒന്നാണെന്നാണ് പ്രേക്ഷകർ പറയുന്നത്.