ജോജു ജോർജ് നായകനാവുന്ന ആന്തോളജി ചിത്രം ഫ്രീഡം ഫൈറ്റ് നേരിട്ട് ഒടിടി റിലീസിന്; ട്രൈലെർ കാണാം..!

മലയാളത്തിന്റെ പ്രിയ നടൻ ജോജു ജോർജ് നായകനാവുന്ന ഒരു ചിത്രം കൂടി നേരിട്ട് ഒടിടി റിലീസ് ആയി എത്തുകയാണ്. കഴിഞ്ഞ മാസം ഒടിടി റിലീസ് ആയി എത്തിയ മധുരം എന്ന ജോജു ചിത്രം ഗംഭീര പ്രേക്ഷക പ്രതികരണമാണ് നേടിയത്. ഇനി ഒടിടി റിലീസ് ആയി എത്തുന്നത് ഫ്രീഡം ഫൈറ്റ് എന്ന ചിത്രമാണ്. മധുരം റിലീസ് ചെയ്ത സോണി ലൈവ് എന്ന ഡിജിറ്റൽ പ്ലാറ്റ്‌ഫോമിൽ തന്നെയാണ് ഈ ചിത്രവും എത്തുന്നത്. റിപ്പബ്ലിക് ഡേ പ്രമാണിച്ചു ചിത്രത്തിന്റെ ട്രൈലെർ സോണി ലൈവ് ടീം പുറത്തു വിട്ടിട്ടുണ്ട്. ഒരു ആന്തോളജി ചിത്രമായി ഒരുക്കിയിരിക്കുന്ന ഫ്രീഡം ഫൈറ്റിൽ ഒട്ടേറെ പ്രശസ്ത താരങ്ങൾ അണിനിരക്കുന്നുണ്ട്. ജോജു ജോർജ്, രോഹിണി, രജിഷ വിജയൻ, ശ്രിന്ദ, കബനി, ജിയോ ബേബി, ഉണ്ണി ലാലു, സിദ്ധാർഥ് ശിവ എന്നിവരാണ് ഇതിലെ പ്രധാന താരങ്ങൾ. കുഞ്ഞില മാസിലാമണി, ജിയോ ബേബി, അഖിൽ അനിൽ കുമാർ, ജിതിൻ ഐസക് തോമസ്, ഫ്രാൻസിസ് ലൂയിസ് എന്നിവരാണ് ഇതിലെ ചിത്രങ്ങൾ സംവിധാനം ചെയ്തിരിക്കുന്നത്.

ജോമോൻ ജേക്കബ്, ഡിജോ അഗസ്റ്റിൻ, സജിൻ എസ് രാജ്, വിഷ്ണു രാജൻ എന്നിവർ ചേർന്ന് നിർമ്മിച്ച ഈ ചിത്രത്തിന് ക്യാമറ ചലിപ്പിച്ചത് സാലു കെ തോമസ്, നിഖിൽ എസ് പ്രവീൺ, ഹിമൽ മോഹൻ എന്നിവരാണ്. ഫ്രാൻസിസ് ലൂയിസ്, കുഞ്ഞില മാസിലാമണി, മുഹ്‌സിൻ പി എം, രോഹിത് വി എസ് വാരിയത്, അപ്പു തരേക് എന്നിവർ ആണ് ഈ ചിത്രത്തിന്റെ എഡിറ്റിങ് നിർവഹിച്ചിരിക്കുന്നതു. രാഹുൽ രാജ്, മാത്യൂസ് പുളിക്കൻ, ബേസിൽ സി ജെ, മാത്തൻ, അർജുൻ വിജയ് എന്നിവർ ചേർന്നാണ് ഇതിലെ ചിത്രങ്ങൾക്ക് സംഗീത സംവിധാനം നിർവഹിച്ചിരിക്കുന്നത്.