ഒരു ഡയലോഗ് പോലും തെറ്റിക്കാത്ത, ഞെട്ടിച്ച ആ നടൻ; തുറന്നു പറഞ്ഞു പൃഥ്വിരാജ് സുകുമാരൻ..!

യുവ സൂപ്പർ താരം പൃഥ്വിരാജ് ഇപ്പോൾ തന്റെ രണ്ടാമത്തെ സംവിധാന സംരംഭമായ ബ്രോ ഡാഡി ചിത്രീകരിക്കുന്നതിനെ തിരക്കിലാണ്. തന്റെ ആദ്യ ചിത്രമായ ലുസിഫെറിൽ നായകനായ കംപ്ലീറ്റ് ആക്ടർ മോഹൻലാൽ തന്നെയാണ് പൃഥ്വിരാജ് ഒരുക്കുന്ന രണ്ടാമത്തെ ചിത്രത്തിലും നായകൻ. പൃഥ്വിരാജ് സുകുമാരനും ഒരു വേഷം ചെയ്യുന്ന ഈ ചിത്രത്തിന്റെ ഷൂട്ടിംഗ് ഇപ്പോൾ ഹൈദരാബാദിൽ പുരോഗമിക്കുകയാണ്. അതോടൊപ്പം തന്നെ താൻ അഭിനയിച്ച കുരുതി എന്ന മലയാള ചിത്രം ആമസോൺ പ്രൈം വഴി ഓഗസ്റ്റ് 11 നു റിലീസ് ചെയ്യുന്നതിനാൽ അതിന്റെ ഓൺലൈൻ പ്രൊമോഷൻ പരിപാടികളിലും പൃഥ്വിരാജ് സജീവമായി പങ്കെടുക്കുന്നുണ്ട്. പൃഥ്വിരാജിനൊപ്പം റോഷന്‍ മാത്യു, മാമുക്കോയ, മുരളി ഗോപി, ഷൈൻ ടോം ചാക്കോ, ശ്രിന്ദ എന്നിവരും കുരുതിയില്‍ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. ഇപ്പോഴിതാ ഈ ചിത്രത്തിലെ തന്നെ ഞെട്ടിച്ച നടൻ ആരാണെന്നു വെളിപ്പെടുത്തുകയാണ് പൃഥ്വിരാജ്.

കുരുതിയുടെ ഷൂട്ടിങ്ങിനിടെ തന്നെ ഞെട്ടിച്ച നടനാണ് മാമുക്കോയയെന്ന് പൃഥ്വിരാജ് പറയുന്നു. മാമുക്കോയയുടെ അഭിനയം വളരെ ഷാര്‍പ്പാണെന്നും അദ്ദേഹം ഒരു ഡയലോഗ് പോലും തെറ്റിച്ച് കണ്ടിട്ടില്ലെന്നും പൃഥ്വിരാജ് വെളിപ്പെടുത്തുന്നു. ഒരു ഡയലോഗ് പോലും അദ്ദേഹം മറന്നുപോയതായി താൻ കണ്ടിട്ടില്ല എന്നും അദ്ദേഹം ഒരു ആക്ഷന്‍ തെറ്റിക്കുന്നതും താൻ കണ്ടിട്ടില്ല എന്നും പൃഥ്വിരാജ് പറഞ്ഞു. വര്‍ഷങ്ങള്‍ക്ക് ശേഷം ഇത്രയും വ്യത്യസ്തമായ ഒരു കഥാപാത്രം കിട്ടിയപ്പോള്‍ അത് പൊളിക്കുമെന്ന് പറഞ്ഞ് ചെയ്ത അദ്ദേഹത്തിന്റെ എനര്‍ജിയെക്കുറിച്ച് പറയാതിരിക്കാന്‍ കഴിയില്ല എന്നും പൃഥ്വിരാജ് കൂട്ടിച്ചേർത്തു. മനു വാര്യർ ആണ് ഈ ചിത്രം സംവിധാനം ചെയ്തിരിക്കുന്നത്. പൃഥ്വിരാജ് സുകുമാരൻ തന്നെയാണ് കുരുതിയുടെ നിർമ്മാതാവും. കുരുതി കൂടാതെ ഭ്രമം എന്ന പൃഥ്വിരാജ് ചിത്രവും ഒടിടി റിലീസ് ആയി എത്തുമെന്ന് സൂചനയുണ്ട്.