കേരളത്തിലെ തീയേറ്ററുകളിൽ ഹൗസ്ഫുൾ ഷോകളുടെ പെരുമഴ; മഹാവിജയമുറപ്പിച്ച് പാപ്പൻ

ഈ കഴിഞ്ഞ വെള്ളിയാഴ്ച റിലീസ് ചെയ്ത സുരേഷ് ഗോപി ചിത്രമായ പാപ്പൻ ഗംഭീര പ്രേക്ഷക പ്രതികരണമാണ് നേടിയെടുക്കുന്നത്. ആദ്യ ദിനം സുരേഷ് ഗോപി ആരാധകരും യുവ പ്രേക്ഷകരും ഏറ്റെടുത്ത ഈ ചിത്രത്തെ ഇപ്പോൾ കുടുംബ പ്രേക്ഷകരും ഇരു കയ്യും നീട്ടി സ്വീകരിക്കുന്ന കാഴ്ചയാണ് കാണാൻ സാധിക്കുന്നത്. കഴിഞ്ഞ ദിവസം കേരളത്തിലെ പ്രധാന കേന്ദ്രങ്ങളിലെ ഈ ചിത്രത്തിന്റെ എല്ലാ ഷോകളും ഹൗസ്ഫുൾ ആയാണ് കളിച്ചതു. മാത്രമല്ല, ആദ്യ ദിനത്തിൽ അൻപതോളം എക്സ്ട്രാ ഷോകളാണ് പാപ്പൻ കളിച്ചതെങ്കിൽ, രണ്ടാം ദിനം അത് നൂറോളമായി എന്നും റിപ്പോർട്ടുകൾ പറയുന്നു.ആദ്യ മൂന്ന് ദിവസംകൊണ്ട് ഈ സുരേഷ് ഗോപി ചിത്രം ഇതിനോടകം തന്നെ 10 കോടി കളക്ഷൻ നേടി എന്ന് റിപോർട്ടുകൾ സൂചിപ്പിക്കുന്നു.

ഒരു മാസ്സ് ക്രൈം ത്രില്ലറായി ഒരുക്കിയ ഈ ചിത്രം രചിച്ചത് ആർ ജെ ഷാൻ, സംവിധാനം ചെയ്തത് ജോഷി എന്നിവരാണ്. സുരേഷ് ഗോപിയുടെ മകൻ ഗോകുൽ സുരേഷ്, നൈല ഉഷ, നീത പിള്ളൈ എന്നിവരും പ്രധാന വേഷങ്ങൾ ചെയ്ത ഈ ചിത്രത്തിൽ എബ്രഹാം മാത്യു മാത്തൻ എന്ന റിട്ടയേർഡ് പോലീസ് ഓഫീസർ ആയാണ് സുരേഷ് ഗോപി അഭിനയിച്ചിരിക്കുന്നത്. ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും, ശ്രീ ഗോകുലം മൂവീസിന്റെയും ബാനറിൽ യഥാക്രമം ഡേവിഡ് കാച്ചപ്പിള്ളിയും റാഫി മതിരയും ഗോകുലം ഗോപാലനും ചേർന്നാണ് ഈ ചിത്രം നിർമ്മിച്ചത്.