ഒരു മിനി ട്വന്റി ട്വന്റി; ഗോൾഡിനെ കുറിച്ച് വെളിപ്പെടുത്തി നിർമ്മാതാവ് ലിസ്റ്റിൻ സ്റ്റീഫൻ

പ്രേമം എന്ന ബ്ലോക്ക്ബസ്റ്റർ ചിത്രമൊരുക്കി ഏഴു വർഷത്തെ ഇടവേളയ്ക്കു ശേഷം അൽഫോൻസ് പുത്രൻ സംവിധാനം ചെയ്ത ചിത്രമാണ് ഗോൾഡ്. ഇപ്പോൾ പോസ്റ്റ് പ്രൊഡക്ഷൻ സ്റ്റേജിലുള്ള ഈ ചിത്രം ഓണം റിലീസായാണ് പ്രേക്ഷകരുടെ മുന്നിലെത്തുക. യുവ സൂപ്പർ താരം പൃഥ്വിരാജ് സുകുമാരൻ, ലേഡി സൂപ്പർ സ്റ്റാർ നയൻതാര എന്നിവർ പ്രധാന വേഷങ്ങൾ ചെയ്യുന്ന ഈ ചിത്രത്തിന്റെ ഒരു ടീസർ, കുറച്ചു പോസ്റ്ററുകളെന്നിവ സോഷ്യൽ മീഡിയയിൽ സൂപ്പർ ഹിറ്റാണ്. ഇപ്പോഴിതാ ഈ ചിത്രത്തെ കുറിച്ച് ഇതിന്റെ നിർമ്മാതാക്കളിലൊരാളായ ലിസ്റ്റിൻ സ്റ്റീഫൻ സംസാരിക്കുകയാണ്. ജിഞ്ചർ മീഡിയക്ക് നൽകിയ അഭിമുഖത്തിലാണ് ലിസ്റ്റിൻ സ്റ്റീഫൻ ഗോൾഡിനെ കുറിച്ച് മനസ്സ് തുറന്നതു. ഗോൾഡ് ഒരു കംപ്ലീറ്റ് അൽഫോൻസ് പുത്രൻ ചിത്രമാണെന്നും, ഈ ചിത്രത്തിൽ അദ്ദേഹമിടപെടാത്ത ഒരു മേഖലയുമില്ലെന്നും ലിസ്റ്റിൻ പറയുന്നു. അതുപോലെ തന്നെ വളരെ ചെറിയ വേഷങ്ങൾ പോലും പ്രമുഖരായ താരങ്ങൾ ചെയ്ത ചിത്രമാണ് ഗോൾഡെന്നും, ഒരു മിനി ട്വന്റി ട്വന്റി എന്ന് ഇതിനെ വിശേഷിപ്പിക്കാമെന്നും ലിസ്റ്റിൻ പറഞ്ഞു.

മാജിക് ഫ്രെയിംസ്, പൃഥ്വിരാജ് പ്രൊഡക്ഷൻസ് എന്നിവയുടെ ബാനറുകളിൽ ലിസ്റ്റിൻ സ്റ്റീഫൻ, സുപ്രിയ മേനോൻ എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രം ഒരു കംപ്ലീറ്റ് ഫൺ ഫിലിം ആയാണ് ഒരുക്കിയത്. ഡെയ്ഞ്ചർ ജോഷി എന്നാണ് ഇതിലെ പൃഥ്വിരാജ് കഥാപാത്രത്തിന്റെ പേര്. മല്ലിക സുകുമാരൻ, അജ്മൽ അമീർ, തെസ്നി ഖാൻ, ബാബുരാജ്, ജഗദീഷ്, കൃഷ്ണ ശങ്കർ, ശബരീഷ് വർമ്മ, ഷമ്മി തിലകൻ, ശാന്തി കൃഷ്ണ, ചെമ്പൻ വിനോദ്, ലാലു അലക്സ്, പ്രേം കുമാർ, സൈജു കുറുപ്പ്, വിനയ് ഫോർട്ട്, റോഷൻ മാത്യു, ഇടവേള ബാബു, സുരേഷ് കൃഷ്ണ, ദീപ്തി സതി, അബു സലിം, അൽത്താഫ് സലിം എന്നിവരും അഭിനയിച്ചിരിക്കുന്ന ഈ ചിത്രത്തിന്റെ എഡിറ്റിംഗ്, സംഘട്ടന സംവിധാനം, കളർ ഗ്രേഡിംഗ് എന്നിവ നിർവ്വഹിച്ചിരിക്കുന്നതും അൽഫോൻസ് പുത്രൻ തന്നെയാണ്. ആനന്ദ് സി ചന്ദ്രൻ ക്യാമറ ചലിപ്പിച്ച ഗോൾഡിന് വേണ്ടി സംഗീതമൊരുക്കിയത് രാജേഷ് മുരുഗേശനാണ്.