കുമ്പളങ്ങി നൈറ്റ്‌സിന് ശേഷം നസ്‌ലൻ ചിത്രവുമായി മധു സി നാരായണൻ?

2019 ൽ പുറത്തിറങ്ങി സൂപ്പർ വിജയം നേടിയ ചിത്രമാണ് കുമ്പളങ്ങി നൈറ്റ്സ്. കേരളത്തിന് അകത്തും പുറത്തും പ്രേക്ഷക- നിരൂപക പ്രശംസ നേടിയ ഈ ചിത്രം സംവിധാനം ചെയ്തത് നവാഗതനായ മധു സി നാരായണൻ ആണ്. അതിന് ശേഷം അഞ്ച് വർഷത്തോളമായി അദ്ദേഹത്തിന്റെ രണ്ടാം ചിത്രത്തിനായി പ്രേക്ഷകർ കാത്തിരിക്കുന്നു. ഇപ്പോഴിതാ, മധു സി നാരായണൻ തന്റെ രണ്ടാം ചിത്രം ഉടനെ തന്നെ പ്രഖ്യാപിക്കുമെന്ന വാർത്തകളാണ് വരുന്നത്.

പ്രേക്ഷകരുടെ പ്രിയങ്കരനായ യുവനടൻ നസ്‌ലൻ ഗഫൂർ ആയിരിക്കും ഈ ചിത്രത്തിലെ നായക വേഷം ചെയ്യുക എന്ന സ്ഥിരീകരിക്കാത്ത റിപ്പോർട്ടുകളാണ് ഇപ്പോൾ വരുന്നത്. മലയാളത്തിലെ ചില സൂപ്പർ താരങ്ങൾ ഉൾപ്പെടെയുള്ളവരെ നായകന്മാരാക്കിയും മധു സി നാരായണൻ ചിത്രങ്ങൾ പ്ലാൻ ചെയ്തെങ്കിലും അവരുടെ തിരക്കുകൾ മൂലം ആ പ്രൊജെക്ടുകൾ വൈകിയത് കൊണ്ടാണ്, നസ്‌ലൻ നായകനാവുന്ന ചിത്രവുമായി ഉടനെ എത്താൻ മധു സി നാരായണൻ പ്ലാൻ ചെയ്യുന്നതെന്നും വാർത്തകളുണ്ട്.

കുമ്പളങ്ങി നൈറ്റ്സ് പോലെ, പ്രമേയം കൊണ്ടും പ്രകടനങ്ങൾ കൊണ്ടും പ്രേക്ഷകരുടെ കയ്യടി നേടുന്ന ഒരു ചിത്രവുമായാവും മധു സി നാരായണൻ വീണ്ടും എത്തുക എന്നാണ് പ്രേക്ഷകരുടെ പ്രതീക്ഷ. ഗിരീഷ് എ ഡി ഒരുക്കിയ ഐ ആം കാതലൻ, ഖാലിദ് റഹ്മാൻ ഒരുക്കിയ ആലപ്പുഴ ജിംഖാന എന്നിവയാണ് ഇനി നസ്‌ലൻ നായകനായി റിലീസ് ചെയ്യാനുള്ള ചിത്രങ്ങളെന്നാണ് സൂചന. ആലപ്പുഴ ജിംഖാനയുടെ ടൈറ്റിൽ പോസ്റ്റർ അടുത്തിടെ റിലീസ് ചെയ്യുകയും മികച്ച ശ്രദ്ധ നേടുകയും ചെയ്തിരുന്നു.