വ്യത്യസ്തമായ പ്രമോഷൻ രീതികളോടെ മുന്തിരി മൊഞ്ചൻ; ചിത്രം റിലീസിന് ഒരുങ്ങുന്നു

നവാഗതനായ വിജിത് നമ്പ്യാർ സംവിധാനം ചെയ്ത ചിത്രമാണ് മുന്തിരി മൊഞ്ചൻ. ഒരു മ്യൂസിക്കൽ കോമഡി എന്റെർറ്റൈനെർ ആയി ഒരുക്കിയിരിക്കുന്ന ഈ ചിത്രം അടുത്ത മാസം ആണ് റിലീസ് ചെയ്യാൻ പോകുന്നത്. ഒരു കൊച്ചു ചിത്രം ആണെങ്കിലും വമ്പൻ ചിത്രങ്ങളുടേതു പോലെയുള്ള വ്യത്യസ്ത പ്രമോഷൻ രീതികളോടെ മുന്തിരി മൊഞ്ചൻ ടീം പ്രേക്ഷകരുടെ ശ്രദ്ധ ചിത്രത്തിലേക്ക് ആകർഷിക്കുകയാണ്. കേരളത്തിലെ തീവണ്ടിയിലും ചിത്രത്തിന് പരസ്യം ഒരുക്കിയാണ് അണിയറ പ്രവർത്തകർ പ്രമോഷൻ നടത്തുന്നത്. ചിത്രത്തിന്റെ പോസ്റ്റർ കേരളത്തിലൂടെ ഓടുന്ന ട്രെയിനുകളിൽ പതിപ്പിച്ചിരിക്കുന്ന ചിത്രങ്ങൾ ഇപ്പോൾ തന്നെ പ്രേക്ഷകരുടെ ശ്രദ്ധ നേടുന്നുണ്ട്.

ഈ ചിത്രത്തിന്റെ കഥയ്ക്ക് ട്രെയിൻ യാത്രയുമായി ബന്ധമുണ്ട്. ചിത്രത്തിലെ കേന്ദ്ര കഥാപാത്രങ്ങൾ ആയ വിവേക് വിശ്വനാഥും ദീപികയും ഒരു ട്രെയിന്‍ യാത്രയ്ക്കിടയിലാണ് പരസ്പരം കണ്ടു മുട്ടുന്നത്. അവിടെ നിന്നാണ് ഇതിന്റെ കഥ വികസിക്കുന്നത്. തുടർന്ന് അവരുടെ ജീവിതത്തിൽ സംഭവിക്കുന്ന കാര്യങ്ങൾ ആണ് ഈ ചിത്രം പറയുന്നത്. വിശ്വാസ് മൂവി പ്രൈവറ്റ് ലിമിറ്റഡിന്റെ ബാനറില്‍ പി.കെ. അശോകന്‍ നിർമ്മാണം നിർവഹിച്ചിരിക്കുന്ന ഈ ചിത്രം രചിച്ചിരിക്കുന്നത് മനു ഗോപാലും മൊഹറലി പൊയ്ലുങ്ങല്‍ ഇസ്മായിലുമാണ്. ഷാന്‍ ഹാഫ്‌സാലി എന്ന ഛായാഗ്രാഹകൻ ഇതിനു വേണ്ടി ദൃശ്യങ്ങൾ ഒരുക്കിയപ്പോൾ ഈ ചിത്രത്തിന് വേണ്ടി പശ്ചാത്തല സംഗീതം നൽകിയിരിക്കുന്നത് റിജോഷ് ആണ്.

ഇതുവരെ ഈ ചിത്രത്തിന്റേതായി റിലീസ് ചെയ്ത പോസ്റ്ററുകൾ, ടീസർ, ട്രൈലെർ എന്നിവയെല്ലാം വലിയ രീതിയിൽ പ്രേക്ഷകരുടെ ശ്രദ്ധ നേടിയെടുത്തിട്ടുണ്ട്. ഇപ്പോൾ വ്യത്യസ്ത പ്രമോഷൻ രീതികൊണ്ട് കൂടെ പ്രേക്ഷകരിൽ പ്രതീക്ഷ സൃഷ്ടിക്കാൻ മുന്തിരി മൊഞ്ചൻ ടീമിന് സാധിച്ചു എന്ന് എടുത്തു പറഞ്ഞേ പറ്റു.