ദിലീപ് നായകനാകുന്ന പുതിയ മാർഷ്യൽ ആർട്സ് ആക്ഷൻ ചിത്രം ‘എന്റർ ദി ഡ്രാഗൺ’

മലയാള സിനിമയിൽ ഒട്ടേറെ സൂപ്പർ ഹിറ്റുകൾ സമ്മാനിച്ചിട്ടുള്ള കൂട്ടുകെട്ടാണ് ദിലീപ്- റാഫി ടീം. റാഫി- മെക്കാർട്ടിൻ ടീം സംവിധായകരായും അതിനു ശേഷം റാഫി ഒറ്റക്കും ദിലീപിനെ വെച്ച് സൂപ്പർ ഹിറ്റ് ചിത്രങ്ങൾ നമ്മുക്ക് മുന്നിൽ എത്തിച്ചിട്ടുണ്ട്. ദിലീപിന്റെ കരിയറിലെ തന്നെ ഏറ്റവും വലിയ ഹിറ്റായ ടു കൺഡ്രീസ് എന്ന ഷാഫി ചിത്രം രചിച്ചത് റാഫി ആണ്. ഇപ്പോഴിതാ ദിലീപിന് വേണ്ടി റാഫി വീണ്ടും തിരക്കഥ രചിക്കുകയാണ്. മാർഷ്യൽ ആർട്സിന്റെ പശ്ചാത്തലത്തിൽ കഥ പറയുന്ന ഈ കോമഡി ചിത്രം സംവിധാനം ചെയ്യാൻ പോകുന്നത് നവാഗതനായ സജി സുകുമാർ ആണ്. എന്റർ ദി ഡ്രാഗൺ എന്നാണ് ഈ ചിത്രത്തിന് നൽകിയിരിക്കുന്ന പേര്.

ചൈനയിൽ ഷൂട്ട് ചെയ്യാൻ പോകുന്ന ഈ ചിത്രം അടുത്ത വർഷം ഓണം റിലീസ് ആയി എത്തിക്കാൻ ആണ് പ്ലാൻ. മിനി സ്റ്റുഡിയോ ആണ് ഈ ചിത്രത്തിന്റെ നിർമ്മാണം നിർവഹിക്കുക, ദിലീപിന്റെ ഷൂട്ടിംഗ് പൂർത്തിയാവാത്ത പ്രൊഫസ്സർ ഡിങ്കൻ എന്ന ചിത്രവും രചിച്ചത് റാഫി ആണ്. ആ ചിത്രവും അടുത്ത വർഷം എത്തുകയാണ് എങ്കിൽ ദിലീപ്- റാഫി കൂട്ടുകെട്ടിൽ ഒരുങ്ങുന്ന രണ്ടു ചിത്രങ്ങൾ ആയിരിക്കും ഒരേ വർഷം പ്രേക്ഷകരുടെ മുൻപിൽ എത്തുക. സുഗീത് സംവിധാനം ചെയ്ത മൈ സാന്റാ ആണ് ദിലീപിന്റെ അടുത്ത റിലീസ്. ഈ വർഷം ക്രിസ്മസിന് ആണ് മൈ സാന്റാ റിലീസ് ചെയ്യുന്നത്.

നാദിർഷ ഒരുക്കുന്ന കേശു ഈ വീടിന്റെ നാഥൻ, ദിലീപ് പോക്കറ്റടിക്കാരന്റെ വേഷത്തിൽ എത്തുന്ന പിക് പോക്കറ്റ്, ദേസി സൂപ്പർ ഹീറോ മോഡലിൽ ഒരുക്കുന്ന പറക്കും പപ്പൻ, ജോഷി ചിത്രം ഓൺ എയർ, വാളയാർ പരമശിവം എന്നിവയൊക്കെയാണ് ദിലീപിന്റെ വരാനിരിക്കുന്ന പ്രൊജെക്ടുകൾ. ഇപ്പോൾ ദിലീപ്- അർജുൻ ചിത്രമായ ജാക്ക് ഡാനിയൽ തീയേറ്ററുകളിൽ പ്രദർശിപ്പിച്ചു കൊണ്ടിരിക്കുകയാണ്.