മാസ്സ് സിനിമകളുടെ തമ്പുരാൻ ഷാജി കൈലാസ് വമ്പൻ തിരിച്ചു വരവിന് ഒരുങ്ങുന്നു .

മലയാള സിനിമാ പ്രേമികൾക്ക് മുന്നിൽ മാസിന്റെ ആറാട്ട് സമ്മാനിച്ച മോഹൻലാൽ- ഷാജി കൈലാസ് ടീം വീണ്ടും ഒന്നിക്കുകയാണ്. മോഹൻലാൽ നായകനായ ഈ ഷാജി കൈലാസ് ചിത്രം അടുത്ത മാസം ഷൂട്ടിംഗ് ആരംഭിക്കും എന്ന വിവരം മോഹൻലാൽ തന്നെയാണ് സോഷ്യൽ മീഡിയ വഴി പ്രഖ്യാപിച്ചത്. രാജേഷ് ജയറാം തിരക്കഥ രചിക്കുന്ന ഈ ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മിക്കുന്നത്. 2 ഇൻഡസ്ട്രി ഹിറ്റ് ചിത്രങ്ങൾ മലയാള സിനിമക്ക് സമ്മാനിച്ച കൂട്ടുകെട്ടാണ് മോഹൻലാൽ- ഷാജി കൈലാസ് ടീം. 1997 ഇൽ ഈ കൂട്ടുകെട്ടിൽ പുറത്തു വന്ന ആറാം തമ്പുരാൻ മലയാള സിനിമാ ചരിത്രത്തിലെ സകല കളക്ഷൻ റെക്കോര്ഡുകളും തകർത്തപ്പോൾ ആ റെക്കോര്ഡ് തകർത്തു വീണ്ടും ഒരു ഇൻഡസ്ട്രി ഹിറ്റ് മലയാളത്തിൽ ഉണ്ടാക്കിയത് ഇതേ കൂട്ടുകെട്ടിൽ 2000 ഇൽ പുറത്തു വന്ന നരസിംഹം എന്ന ചിത്രമാണ്.

ഷാജി കൈലാസ് നിർമ്മിച്ച സൂപ്പർ ഹിറ്റ് സിബി മലയിൽ ചിത്രമായ ഉസ്താദിലും മോഹൻലാൽ ആയിരുന്നു നായകൻ. നരസിംഹം കഴിഞ്ഞു താണ്ഡവം, സൂപ്പർ ഹിറ്റായ നാട്ടുരാജാവ്, സൂപ്പർ ഹിറ്റായ ബാബ കല്യാണി, അലി ഭായി, റെഡ് ചില്ലീസ് തുടങ്ങിയ ഷാജി കൈലാസ് ചിത്രങ്ങളിലും മോഹൻലാൽ അഭിനയിച്ചിട്ടുണ്ട്. 12 വർഷങ്ങൾക്ക് ശേഷമാണ് മോഹൻലാൽ വീണ്ടും ഷാജി കൈലാസിന് ഒപ്പം എത്തുന്നത്. ഇപ്പോൾ പൃഥ്വിരാജ് ഒരുക്കുന്ന ബ്രോ ഡാഡി തീർത്ത മോഹൻലാൽ നാളെ മുതൽ ജീത്തു ജോസഫ് ഒരുക്കുന്ന 12ത് മാനിൽ ജോയിൻ ചെയ്യും. അത് തീർത്തതിനു ശേഷം ഒക്ടോബർ മാസത്തിൽ ഷാജി ചിത്രം ചെയ്യാനാണ് മോഹൻലാൽ തീരുമാനിച്ചിരിക്കുന്നത്. പൃഥ്വിരാജ് നായകനായി എത്തുന്ന കടുവ എന്ന ചിത്രം പാതി ഷൂട്ട് ചെയ്ത് നിർത്തിയിരിക്കുകയാണ് ഷാജി കൈലാസ്.