മോഹൻലാൽ വീണ്ടും ബോളിവുഡിൽ

മലയാളത്തിലെ സൂപ്പർ മെഗാ താരമായ മോഹൻലാൽ വീണ്ടും ബോളിവുഡിൽ എത്തുന്നു എന്നുള്ള വാർത്തകളാണ് ഇപ്പോൾ പുറത്തു വരുന്നത്. ഇതിനു മുൻപ് മൂന്നു ബോളിവുഡ് ചിത്രങ്ങളിൽ ആണ് മോഹൻലാൽ അഭിനയിച്ചിട്ടുള്ളത്. 2002 ഇൽ റാം ഗോപാൽ വർമ്മ ഒരുക്കിയ കമ്പനി എന്ന ചിത്രത്തിലൂടെ ബോളിവുഡിൽ അരങ്ങേറ്റം കുറിച്ച മോഹൻലാൽ ആ ചിത്രത്തിലെ ഗംഭീര പ്രകടനത്തിലൂടെ, ബോളിവുഡിലെ ഏറ്റവും വലിയ സിനിമാ പുരസ്‍കാരമായ  ഐഫ അവാർഡ് നേടുന്ന ആദ്യ മലയാള താരവുമായി മാറി. മികച്ച സഹനടനുള്ള ആ വർഷത്തെ അവാർഡ് ആണ് മോഹൻലാൽ ഏറ്റു വാങ്ങിയത്. അതിനു ശേഷം റാം ഗോപാൽ വർമ്മ തന്നെ ഒരുക്കിയ ആഗ് എന്ന ചിത്രത്തിൽ അമിതാബ് ബച്ചനൊപ്പവും പ്രിയദർശൻ ഒരുക്കിയ തേസ് എന്ന ചിത്രത്തിൽ അജയ് ദേവ്ഗണിന് ഒപ്പവും മോഹൻലാൽ അഭിനയിച്ചു. പലപ്പോഴായി ബോളിവുഡ് ചിത്രങ്ങളിൽ നിന്ന് ഓഫർ വന്നെങ്കിലും മലയാളത്തിലെ തിരക്ക് മൂലം അതെല്ലാം അദ്ദേഹം ഉപേക്ഷിക്കുകയായിരുന്നു. കുമാർ സാഹ്നി, വിശാൽ ഭരദ്വാജ്, ഷൂജിത് സർക്കാർ തുടങ്ങി ഒട്ടേറെ ബോളിവുഡ് സംവിധായകർ മോഹൻലാലിനെ സമീപിച്ചതുമാണ്.

എന്നാൽ ഇപ്പോൾ വലിയ ഇടവേളയ്ക്കു ശേഷം മോഹൻലാൽ ഒരു ബോളിവുഡ് ചിത്രത്തിൽ പ്രത്യക്ഷപ്പെടാൻ തീരുമാനിച്ചിരിക്കുകയാണ് എന്നാണ് വാർത്തകൾ പറയുന്നത്. ഒടിയൻ എന്ന മോഹൻലാൽ നായകനായ മലയാള ചിത്രമൊരുക്കിയ ശ്രീകുമാർ മേനോൻ ഒരുക്കുന്ന പുതിയ ചിത്രമാണ് മിഷൻ കൊങ്കൺ. ടി ഡി രാമകൃഷ്ണൻ തിരക്കഥ രചിക്കുന്ന ഈ ചിത്രം ഹിന്ദിയിൽ ആണ് ഒരുക്കുന്നത്. ഈ ചിത്രത്തിൽ ഖലാസി ആയി ഒരു അതിഥി വേഷത്തിലാവും മോഹൻലാൽ എത്തുക എന്നാണ് സൂചന. പ്രശസ്ത ബോളിവുഡ് താരം രൺദീപ് ഹൂഡയും ഈ ചിത്രത്തിൽ പ്രധാന വേഷം ചെയ്യുമെന്നും റിപ്പോർട്ടിൽ ഉണ്ട്. ഫോക്സ് സ്റ്റാർ സ്റ്റുഡിയോസ് നിർമ്മാണം ഏറ്റെടുക്കാൻ സാധ്യതയുള്ള ഈ ചിത്രം ഹിന്ദിക്ക് പുറമെ മലയാളം ഉൾപ്പെടെയുള്ള മറ്റു തെന്നിന്ത്യൻ ഭാഷകളിലും പുറത്തു വരും. ഹോളിവുഡിൽ നിന്നുള്ള സാങ്കേതിക പ്രവർത്തകർ വരെ അണിനിരക്കുന്ന ഒരു വലിയ ചിത്രമാകും ഇതെന്നാണ് സൂചന.