രജനികാന്ത് ചിത്രത്തിൽ ഗ്യാങ്സ്റ്റർ ആയി മോഹൻലാൽ?; ചർച്ച ചെയ്ത് സോഷ്യൽ മീഡിയ

സൂപ്പർസ്റ്റാർ രജനികാന്ത് നായകനായി എത്തുന്ന ജയിലർ എന്ന ചിത്രത്തിൽ കംപ്ലീറ്റ് ആക്ടർ മോഹൻലാൽ അതിഥി വേഷത്തിൽ എത്തുന്നു എന്ന വാർത്ത ഇപ്പോഴും ട്രെൻഡിങ് ആയി തുടരുകയാണ്. ഇന്നലെ ഈ ചിത്രത്തിന്റെ ഹൈദരാബാദ് ഉള്ള സെറ്റിൽ ജോയിൻ ചെയ്ത മോഹൻലാൽ 2 ദിവസമാണ് ഷൂട്ടിൽ പങ്കെടുക്കുക. കഴിഞ്ഞ ദിവസം സെറ്റിൽ എത്തിയ മോഹൻലാലിന്റെ ഈ ചിത്രത്തിലെ ലുക്ക് ജയിലറിന്റെ അണിയറ പ്രവർത്തകർ പുറത്ത് വിട്ടിരുന്നു. വമ്പൻ സ്വീകരണമാണ് ഈ ലുക്കിന്‌ പ്രേക്ഷകരിൽ നിന്നും ലഭിച്ചത്. ഇപ്പോഴിതാ ഈ ചിത്രത്തിലെ മോഹൻലാൽ കഥാപാത്രത്തെ കുറിച്ചുള്ള ഫാൻ തിയറികൾ ആണ് സോഷ്യൽ മീഡിയയിൽ നിറയുന്നത്. മോഹൻലാൽ ഇതിൽ ഒരു ഗ്യാങ്സ്റ്റർ ആയാണ് എത്തുന്നതെന്ന ഫാൻ തിയറിയാണ് ഇപ്പോൾ ഏറ്റവും കൂടുതൽ ചർച്ച ചെയ്യപ്പെടുന്നത്.

ഒരു വിന്റേജ് സ്റ്റൈൽ ലുക്ക് ആണ് മോഹൻലാലിന്റെ എന്നത് കൊണ്ട് തന്നെ ഇത് ആ കഥാപാത്രത്തിന്റെ ഫ്ലാഷ് ബാക്ക് സമയത്തെ ലുക്ക് ആണെന്ന് പറയുന്നവരും ഉണ്ട്. രജനികാന്ത്- മോഹൻലാൽ എന്നിവർ നേർക്ക് നേരെ വരുമോ എന്നറിയാനുള്ള ആകാംഷയിലാണ് പ്രേക്ഷകർ. അങ്ങനെ ആണെങ്കിൽ ജയിലറിന് ഒരു രണ്ടാം ഭാഗവും പ്രതീക്ഷിക്കാമെന്നും ആരാധകർ അഭിപ്രായപ്പെടുന്നു. കോലമാവ്‌ കോകില, ഡോക്ടർ എന്നീ വലിയ ഹിറ്റുകളും ബീസ്റ്റ് എന്ന ദളപതി വിജയ് ചിത്രവും ഒരുക്കിയ നെൽസൺ ദിലീപ്കുമാർ സംവിധാനം ചെയ്യുന്ന ഈ ബിഗ് ബഡ്ജറ്റ് ചിത്രം നിർമ്മിക്കുന്നത് സൺ പിക്ചേഴ്സ് ആണ്. അനിരുദ്ധ് രവിചന്ദർ സംഗീത സംവിധാനം നിർവഹിക്കുന്ന ഈ ചിത്രത്തിൽ കന്നഡ സൂപ്പർ താരം ശിവരാജ് കുമാർ, രമ്യ കൃഷ്ണൻ, മലയാള നടൻ വിനായകൻ, യോഗി ബാബു തുടങ്ങി ഒരു വലിയ താരനിര തന്നെ അണിനിരക്കുന്നുണ്ട്.