മെർസലിന് കേരളത്തിൽ ഇന്ന് മെഗാ റിലീസ്

ഇളയ ദളപതി വിജയ് നായകനായി എത്തിയ ബ്രഹ്മാണ്ഡ ചിത്രം മെർസൽ ഇന്ന് ലോകമെമ്പാടുമുള്ള സ്‌ക്രീനുകളിൽ എത്തുന്നു. ലോകമെമ്പാടുമുള്ള 3300 ഇത് അധികം സ്‌ക്രീനുകളിൽ എത്തുന്ന ഈ ചിത്രം കേരളത്തിലെ 290 ഓളം സ്‌ക്രീനുകളിൽ ആണ് എത്തുന്നത്. രാവിലെ ആറു മണി മുതൽ ഫാൻ ഷോസ് തുടങ്ങുന്ന ഈ ചിത്രം കേരളത്തിൽ 150 ഓളം ഫാൻ ഷോസ് ആണ് കളിക്കുന്നത്. ഇതൊരു റെക്കോർഡ് ആണ്.

ആറ്റ്ലീ വിജയെ നായകനാക്കി സംവിധാനം ചെയ്യുന്ന രണ്ടാമത്തെ ചിത്രമാണ് മെർസൽ. തെരി എന്നൊരു ബ്ലോക്ക്ബസ്റ്റർ ചിത്രം ഇതിനു മുന്നേ ഈ കൂട്ടുകെട്ടിൽ നിന്ന് പുറത്തു വന്നിട്ടുണ്ട്. അറ്റ്ലീയും ബാഹുബലി രചയിതാവ് കെ വി വിജയേന്ദ്ര പ്രസാദുമാണ് മെർസൽ എന്ന ഈ ചിത്രത്തിന്റെ തിരക്കഥ ഒരുക്കിയിരിക്കുന്നത്. രണ്ടു മണിക്കൂർ അമ്പതു മിനിട്ടാണ് ഈ ചിത്രത്തിന്റെ ദൈർഖ്യം.

വിജയുടെ കരിയറിലെ തന്നെ ഏറ്റവും വലിയ ചിത്രമായ മെർസൽ നിർമ്മിച്ചിരിക്കുന്നത് തേനൻഡൽ ഫിലിംസ് ആണ്. വിജയ് ആദ്യമായി ട്രിപ്പിൾ റോളിൽ എത്തിയിരിക്കുന്ന ഈ ചിത്രത്തിൽ സാമന്ത , കാജൽ അഗർവാൾ, നിത്യ മേനോൻ എന്നിവർ ആണ് നായികമാർ. എസ്‌ ജെ സൂര്യ, സത്യരാജ്, വടിവേലു എന്നിവരും ഈ ചിത്രത്തിൽ പ്രധാന വേഷങ്ങൾ അവതരിപ്പിച്ചിട്ടുണ്ട്.

എ ആർ റഹ്മാൻ സംഗീതം പകർന്നിരിക്കുന്ന ഈ ചിത്രത്തിന് ദൃശ്യങ്ങൾ ഒരുക്കിയത് വിഷ്ണുവും എഡിറ്റിംഗ് നിർവഹിച്ചത് റുബെനുമാണ്. ഗ്ലോബൽ യുണൈറ്റഡ് മീഡിയ ആണ് ഈ ചിത്രം കേരളത്തിലെ തീയേറ്ററുകളിൽ പ്രദർശനത്തിന് എത്തിക്കുന്നത്. ഏതായാലും ഈ ദീപാവലിക്കു വിജയ് ആരാധകർക്കും മാസ്സ് ചിത്രങ്ങളെ ഇഷ്ട്ടപെടുന്ന പ്രേക്ഷകർക്കും മുന്നിൽ ഒരു വമ്പൻ വിരുന്നൊരുക്കുകയാണ് മെർസൽ എന്ന ചിത്രം.