കേരളത്തിൽ മെർസലിന് വമ്പൻ സ്വീകരണം..ആരാധകരെ ആവേശത്തിലാഴ്ത്തി മെർസൽ.

ഇന്ന് ലോകമെമ്പാടും പ്രദർശനമാരംഭിച്ച മെർസലിന് കേരളക്കരയിലും വമ്പൻ സ്വീകരണം. ഇളയ ദളപതി വിജയ് നായകനായി എത്തിയ ഈ ബ്രഹ്മാണ്ഡ ചിത്രം സംവിധാനം ചെയ്തത് ആറ്റ്ലീ ആണ്. തേനാണ്ടൽ ഫിലിംസ് 130 കോടിയോളം മുതൽ മുടക്കിൽ നിർമ്മിച്ച ഈ ചിത്രം കേരളത്തിലെ ഏറ്റവും വലിയ റിലീസുകളിൽ ഒന്നാണ് .

ബാഹുബലി കേരളത്തിൽ എത്തിച്ച ഗ്ലോബൽ യുണൈറ്റഡ് മീഡിയ ആണ് ഈ ചിത്രവും കേരളത്തിൽ വിതരണം ചെയ്തത്. ആദ്യ ഷോ മുതൽ ഗംഭീര അഭിപ്രായം നേടിയ ഈ ചിത്രം ആരാധകരെ ആവേശത്തിലാഴ്ത്തിയാണ് മുന്നേറുന്നത്. ചിത്രത്തിൽ വിജയ് മൂന്നു വേഷങ്ങളിൽ ആണ് എത്തിയിരിക്കുന്നത്. ആരാധകരെ ത്രസിപ്പിക്കുന്ന ടെറാ മാസ്സ് പ്രകടനമാണ് ഇളയ ദളപതി ഈ ചിത്രത്തിൽ നടത്തിയിരിക്കുന്നത്.

കേരളത്തിൽ അങ്ങോളം ഇങ്ങോളം വമ്പൻ ആഘോഷ പരിപാടികൾ നടത്തിയാണ് ആരാധകർ മെർസലിനെ വരവേറ്റത്. 150 ഇൽ അധികം ഫാൻസ്‌ ഷോകൾ ആണ് കേരളത്തിൽ ഈ ചിത്രത്തിനായി ആരാധകർ നടത്തിയത്. ഇത് കേരളത്തിൽ ഒരു സിനിമയ്ക്കു കിട്ടുന്ന ഫാൻസ്‌ ഷോകളുടെ എണ്ണത്തിൽ റെക്കോർഡ് ആണ്.

എ ആർ റഹ്മാന്റെ ത്രസിപ്പിക്കുന്ന സംഗീതവും, എസ് ജെ സൂര്യ എന്ന വില്ലന്റെ മിന്നുന്ന പ്രകടനവും ചിത്രത്തിന് മുതൽക്കൂട്ടായി മാറിയിട്ടുണ്ട്. സാമന്ത, കാജൽ അഗർവാൾ, നിത്യ മേനോൻ എന്നിവരുടെ സാന്നിധ്യവും ചിത്രത്തെ കൂടുതൽ മനോഹരമാക്കിയിട്ടുണ്ട്.

ഈ ദീപാവലിക്ക് വിജയ്- ആറ്റ്ലീ ടീം ആരാധകർക്ക് സമ്മാനിച്ച ഒരടിപൊളി വെടിക്കെട്ടു ചിത്രമാണ് മെർസൽ. കേരളമെങ്ങും ഇപ്പോൾ ഈ ചിത്രത്തിന് ഹൌസ് ഫുൾ ഷോകളുടെ പൊടിപൂരം ആണ്.

മെർസൽ തരംഗം കേരളവും കീഴടക്കിക്കൊണ്ടിരിക്കുകയാണ് എന്ന് നിസംശയം നമ്മുക്ക് പറയാൻ സാധിക്കും . ആരാധകരും മാസ്സ് ചിത്രങ്ങൾ ഇഷ്ട്ടപെടുന്ന പ്രേക്ഷകരും ഇരു കയ്യും നീട്ടി സ്വീകരിച്ചതോടെ തലപതിയുടെ കരിയറിലെ ഏറ്റവും വലിയ വിജയത്തിലേക്കാണ് മെർസൽ നീങ്ങുന്നത്.