മാട്ടുപ്പെട്ടി മച്ചാൻ രണ്ടാം ഭാഗം അണിയറയിൽ ഒരുങ്ങുന്നു….!!

21 വർഷം മുൻപാണ് മലയാളി പ്രേക്ഷകരെ കുടുകുടെ ചിരിപ്പിച്ചു കൊണ്ട് ഒരു കോമഡി ഫാമിലി എന്റെർറ്റൈനെർ എത്തിയത്. മാട്ടുപ്പെട്ടി മച്ചാൻ എന്ന ആ ചിത്രം ആ വർഷത്തെ സർപ്രൈസ് ഹിറ്റായിരുന്നു എന്ന് തന്നെ പറയാം. മുകേഷ്, ബൈജു, ജഗതി ശ്രീകുമാർ, ഒടുവിൽ ഉണ്ണികൃഷ്ണൻ എന്നിവർ തകർത്തഭിനയിച്ച ആ ചിത്രം സംവിധാനം ചെയ്തത് ജോസ് തോമസും തിരക്കഥ രചിച്ചത് ഉദയ കൃഷ്ണ- സിബി കെ തോമസ് ടീമും ആയിരുന്നു. ആ ചിത്രത്തിലെ ഡയലോഗുകളും കോമഡി രംഗങ്ങളും ഇന്നും പോപ്പുലർ ആണ്.  മിനി സ്ക്രീനിലും മാട്ടുപ്പെട്ടി മച്ചാൻ വമ്പൻ വിജയമായി മാറിയിരുന്നു. ഇപ്പോഴിതാ ആ സൂപ്പർ ഹിറ്റ് ചിത്രത്തിന് ഒരു രണ്ടാം ഭാഗം ഒരുക്കാനുള്ള തയ്യാറെടുപ്പിലാണ് സംവിധായകൻ ജോസ് തോമസ്. നടൻ ബൈജു ആണ് അടുത്തിടെ നടന്ന ഒരു മാധ്യമ അഭിമുഖത്തിൽ ഈ വിവരം പങ്കു വെച്ചത്.

ശ്കതമായ ഒരു തിരക്കഥ തയ്യാറാക്കാനുള്ള ശ്രമത്തിലാണ് ചിത്രത്തിന്റെ പിന്നിലുള്ളവർ എന്നും ബൈജു പറഞ്ഞിരുന്നു. ജഗതി, ഒടുവിൽ ഉണ്ണികൃഷ്ണൻ എന്നിവരുടെ അഭാവം ഒരു പ്രശ്നമാണെങ്കിലും എല്ലാം നന്നായി വന്നാൽ മാട്ടുപ്പെട്ടി മച്ചാൻ രണ്ടാം ഭാഗം ഒരുങ്ങും എന്ന് തന്നെയാണ് പ്രതീക്ഷയെന്നാണ് ബൈജു പറയുന്നത്. മോഹൻലാൽ നായകനായ പൃഥ്വിരാജ് ചിത്രം ലുസിഫെറിൽ മുരുകൻ എന്ന ഒരു വേഷം ചെയ്ത ബൈജു കാത്തിരിക്കുന്നത് മേരാ നാം ഷാജി എന്ന നാദിർഷ ചിത്രത്തിന്റെ റിലീസിന് ആണ്. ബിജു മേനോൻ, ബൈജു, ആസിഫ് അലി എന്നിവർ ആണ് ഈ ചിത്രത്തിലെ നായകന്മാർ. വരുന്ന ഏപ്രിൽ അഞ്ചിന് ആണ് മേരാ നാം ഷാജി റിലീസ് ചെയ്യാൻ പോകുന്നത്.