മമ്മൂട്ടി- മഞ്ജു വാര്യർ ടീം വീണ്ടും; ത്രില്ലറുമായി ബി ഉണ്ണികൃഷ്ണൻ..!

ആറാട്ട് എന്ന മോഹൻലാൽ ചിത്രത്തിന് ശേഷം, ഇനി മമ്മൂട്ടിക്കൊപ്പം ഒരു ചിത്രവുമായി എത്താൻ ഒരുങ്ങുകയാണ് പ്രശസ്ത സംവിധായകൻ ബി ഉണ്ണികൃഷ്ണൻ. ഉദയ കൃഷ്ണ തിരക്കഥ രചിക്കുന്ന ഈ ചിത്രം ഒരു ഇൻവെസ്റ്റിഗേഷൻ ത്രില്ലർ ആയാണ് ഒരുക്കുന്നത് എന്നാണ് വാർത്തകൾ പറയുന്നത്. വലിയ കാൻവാസിൽ ഒരുക്കാൻ പോകന്ന ഈ ചിത്രം ഒരു റിയൽ ലൈഫ് സംഭവത്തിൽ നിന്ന് പ്രചോദനം ഉൾക്കൊണ്ടാണ് ഒരുക്കുന്നത് എന്നാണ് സൂചന. കേരളം, ബാംഗ്ലൂർ എന്നിവിടങ്ങളിൽ ആയാവും ഈ ചിത്രത്തിന്റെ ഷൂട്ടിംഗ് എന്നും മുപ്പതു കോടിയോളം ബഡ്ജറ്റ് വരുന്ന ഈ ചിത്രത്തിന്റെ സഹനിർമ്മാതാവ് കൂടിയായിരിക്കും സംവിധായകൻ ബി ഉണ്ണികൃഷ്ണൻ എന്നും വാർത്തകൾ പറയുന്നു. എന്നാൽ മമ്മൂട്ടിക്കൊപ്പം ലേഡി സൂപ്പർ സ്റ്റാർ മഞ്ജു വാര്യരും എത്തുന്നു എന്നതാണ് ഈ ചിത്രത്തിന്റെ ഹൈലൈറ്റ് എന്നാണ് സൂചന.

ജോഫിൻ ടി ചാക്കോ ഒരുക്കിയ പ്രീസ്റ്റ് എന്ന ഹിറ്റ് ചിത്രത്തിന് ശേഷം മമ്മൂട്ടി- മഞ്ജു വാര്യർ ടീം ഒന്നിക്കുന്ന ചിത്രമായിരിക്കും ഇത്. ഇവർക്കൊപ്പം ബിജു മേനോൻ, സിദ്ദിഖ് എന്നിവരും ഈ ചിത്രത്തിന്റെ താരനിരയിൽ ഉണ്ടാകും. ഈ ചിത്രം കൂടാതെ ദിലീപ് നായകനാവുന്ന ഒരു ചിത്രവും, മോഹൻലാൽ നായകനാവുന്ന ഒരു ത്രില്ലറും ബി ഉണ്ണികൃഷ്ണൻ പ്ലാൻ ചെയ്യുന്നുണ്ട്. മമ്മൂട്ടി ഇപ്പോൾ ചെയ്തു കൊണ്ടിരിക്കുന്നത് നിസാം ബഷീർ ഒരുക്കുന്ന പേരിടാത്ത ത്രില്ലർ ചിത്രത്തിൽ ആണ്. മമ്മൂട്ടി തന്നെ നിർമ്മിക്കുകയും ചെയ്യുന്ന ഈ ചിത്രം പൂർത്തിയാക്കി, അടുത്ത മാസം അവസാനത്തോടെ ആയിരിക്കും ബി ഉണ്ണികൃഷ്ണൻ ചിത്രത്തിൽ അദ്ദേഹം ജോയിൻ ചെയ്യുക എന്നാണ് സൂചന. പ്രമാണി എന്ന ചിത്രമാണ് ബി ഉണ്ണികൃഷ്ണൻ- മമ്മൂട്ടി ടീം ഇതിനു മുൻപ് ചെയ്തത്.