ലൂസിഫറും ഭീഷ്മ പർവവും വീണു; കേരളത്തിൽ പുതിയ വീക്കെൻഡ് റെക്കോർഡ് കുറിച്ച് കെ ജി എഫ് 2 ..!

റോക്കിങ് സ്റ്റാർ യാഷ് നായകനായി എത്തിയ കെ ജി എഫ് 2 ഓൾ ഇന്ത്യ തലത്തിൽ തന്നെ വ്യത്യസ്ത മാർക്കറ്റുകളിൽ പുതിയ റെക്കോർഡുകളാണ് സൃഷ്ടിക്കുന്നത്. ഇപ്പോഴിതാ കേരളത്തിലും രണ്ടു പുത്തൻ റെക്കോർഡുകൾ ഈ ചിത്രം ഉണ്ടാക്കി കഴിഞ്ഞു. കേരളത്തിൽ ആദ്യ ദിനം ഏറ്റവും കൂടുതൽ കളക്ഷൻ നേടുന്ന ചിത്രമെന്ന റെക്കോർഡ് ആണ് കെ ജി എഫ് 2 ആദ്യം നേടിയത്. ഇവിടെ നിന്ന് ആദ്യ ദിനം ഏഴു കോടി മുപ്പതു ലക്ഷം രൂപം ഗ്രോസ് നേടിയ ഈ ചിത്രം, ഏഴു കോടി ഇരുപത്തിരണ്ടു ലക്ഷം ആദ്യ ദിനം നേടിയ മോഹൻലാൽ ചിത്രമായ ഒടിയൻ സ്ഥാപിച്ച റെക്കോർഡ് ആണ് തകർത്തത്. ഇപ്പോഴിതാ മറ്റൊരു കേരളാ റെക്കോർഡ് കൂടി കൂടി കെ ജി എഫ് 2 നേടിയിരിക്കുകയാണ്. ആദ്യ വീക്കെൻഡിൽ കേരളത്തിൽ ഏറ്റവും കൂടുതൽ കളക്ഷൻ നേടുന്ന ചിത്രമെന്ന റെക്കോർഡ് ആണത്.

മോഹൻലാൽ നായകനായ ലൂസിഫർ, മമ്മൂട്ടി നായകനായ ഭീഷ്മ പർവ്വം എന്നീ ചിത്രങ്ങൾ കൈവശം വെച്ചിരുന്ന റെക്കോർഡ് ആണ് ഇപ്പോൾ കെ ജി എഫ് 2 നേടിയിരിക്കുന്നത്. ലൂസിഫർ, ഭീഷ്മ പർവ്വം എന്നീ ചിത്രങ്ങൾ ആദ്യ നാലു ദിവസം കൊണ്ട് കേരളത്തിൽ നിന്നും നേടിയ ഗ്രോസ് കളക്ഷൻ 22 കോടിക്ക് മുകളിൽ ആണെങ്കിൽ, കെ ജി എഫ് 2 ആദ്യ നാല് ദിവസം കൊണ്ട് നേടിയത് 27 കോടി രൂപയ്ക്കു മുകളിൽ ആണ്. ആദ്യ നാലു ദിവസം കൊണ്ട് കേരളത്തിൽ ഈ ചിത്രം കളിച്ചതു 7000 ഷോകൾക്ക് മുകളിൽ ആണ്. ഹോംബാലെ ഫിലിംസ് നിർമ്മിച്ച് പ്രശാന്ത് നീൽ സംവിധാനം ചെയ്ത ഈ ചിത്രം കേരളത്തിൽ വിതരണം ചെയ്തത് പൃഥ്വിരാജ് പ്രൊഡക്ഷൻസ് ആണ്.