പതിനാലു പുതുമുഖങ്ങൾക്കൊപ്പം മമ്മൂട്ടി; ആകാംഷയോടെ പ്രേക്ഷകർ..!

കഴിഞ്ഞ ദിവസമാണ് പ്രമുഖ സിനിമാ നിർമ്മാണ വിതരണ കമ്പനിയായ ഓഗസ്റ്റ് സിനിമാസ് തങ്ങളുടെ പുതിയ ചിത്രത്തിലെ ഒരു നിർണായക വേഷമവതരിപ്പിക്കുന്ന താരത്തെ പ്രഖ്യാപിച്ചത്. ശങ്കർ രാമകൃഷ്ണൻ ആദ്യമായി സംവിധാനം ചെയ്യുന്ന പതിനെട്ടാം പടി എന്ന ചിത്രത്തിൽ മെഗാസ്റ്റാർ മമ്മൂട്ടിയും ഒരു പ്രധാന വേഷം ചെയ്യും എന്ന പ്രഖ്യാപനമാണ് കഴിഞ്ഞ ദിവസം വന്നത്. ഏകദേശം ഇരുപതു മിനിറ്റോളം നീണ്ടു നിൽക്കുന്ന ഒരു അതിഥി വേഷം ആണ് മമ്മൂട്ടി ഈ ചിത്രത്തിൽ ചെയ്യുന്നത്. ജോൺ എബ്രഹാം പാലക്കൽ എന്ന ഒരു റിട്ടയേർഡ് ആർമി ഓഫീസർ ആയാണ് മമ്മൂട്ടി ഈ ചിത്രത്തിൽ എത്തുന്നത് എന്നാണ് സൂചന. മമ്മൂട്ടിയെ കൂടാതെ പൃഥ്വിരാജ് സുകുമാരൻ, ടോവിനോ തോമസ് എന്നിവരും ഈ ചിത്രത്തിൽ അതിഥി വേഷം ചെയ്യുന്നുണ്ട് എന്നും റിപ്പോർട്ടുകൾ ഉണ്ട്. പതിനാലു പുതുമുഖങ്ങൾ ആണ് ഈ ചിത്രത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്.

കേരളത്തിലെ പതിനാലു ജില്ലകളിൽ നിന്നും തിരഞ്ഞെടുത്ത പതിനാലു പുതുമുഖങ്ങൾ ആണ് ഈ ചിത്രത്തിൽ അഭിനയിക്കുന്നത്. ഈ പുതുമുഖങ്ങൾക്കൊപ്പം മെഗാസ്റ്റാർ മമ്മൂട്ടിയും കൂടിയെത്തുന്നതോടെ പ്രേക്ഷകർ ഏറെ ആവേശത്തിലാണ്. ഒരു ആക്ഷൻ ത്രില്ലർ ആയി ഒരുങ്ങാൻ പോകുന്ന ഈ ചിത്രത്തിന് സംഘട്ടനം ഒരുക്കാൻ പോകുന്നത് പ്രശസ്ത സ്റ്റണ്ട് മാസ്റ്റർ ആയ കെച്ചയും ടീമും ആണ്. ഈ ചിത്രത്തിന് വേണ്ടി ഒരു ആക്ഷൻ വർക്ക് ഷോപ്പും അവർ നടത്തിയിരുന്നു. ശങ്കർ രാമകൃഷ്ണൻ തന്നെ തിരക്കഥ രചിച്ച ഈ ചിത്രത്തിന്റെ ടൈറ്റിൽ ഫോണ്ട് റിലീസ് ചെയ്തത് കമ്പ്ലീറ്റ് ആക്ടർ മോഹൻലാൽ ആണ്. മമ്മൂട്ടി കിടിലൻ ലുക്കിൽ പ്രത്യക്ഷപ്പെടുന്ന ഈ ചിത്രം ഇപ്പോൾ തന്നെ സോഷ്യൽ മീഡിയയിൽ വലിയ ചർച്ചാ വിഷയം ആയി കഴിഞ്ഞു.