ആ സൂപ്പർ ഹിറ്റ് ചിത്രത്തിൽ നായികയാവേണ്ടിയിരുന്നത് മാളവിക ജയറാം; മകളുടെ സിനിമാ അരങ്ങേറ്റത്തെ കുറിച്ച് വെളിപ്പെടുത്തി താരം..!

2020 ഇൽ മലയാളത്തിൽ റിലീസ് ചെയ്തു സൂപ്പർ ഹിറ്റായ ചിത്രമാണ് വരനെ ആവശ്യമുണ്ട്. സത്യൻ അന്തിക്കാടിന്റെ മകൻ അനൂപ് സത്യൻ സംവിധായകനായി അരങ്ങേറ്റം കുറിച്ച ആ ചിത്രത്തിൽ നായകനായി എത്തിയത് സുരേഷ് ഗോപി ആണ്. സുരേഷ് ഗോപി- ശോഭന ടീം പ്രധാന വേഷങ്ങൾ ചെയ്ത ആ ചിത്രത്തിൽ ദുൽഖർ സൽമാൻ- കല്യാണി പ്രിയദർശൻ ടീമും നിർണ്ണായക വേഷങ്ങൾ ചെയ്തു. ആ ചിത്രം നിർമ്മിച്ചതും ദുൽഖർ സൽമാൻ ആണ്. ഇപ്പോഴിതാ, അതിൽ കല്യാണി ചെയ്ത വേഷം ചെയ്യാൻ അനൂപ് ആദ്യം സമീപിച്ചത് തന്റെ മകൾ മാളവികയെ ആണെന്ന് വെളിപ്പെടുത്തിയിരിക്കുകയാണ് നടൻ ജയറാം. മകളുടെ സിനിമാ പ്രവേശനത്തെ കുറിച്ച് ചോദിച്ചപ്പോൾ ആണ് അദ്ദേഹം ഈ കാര്യം വെളിപ്പെടുത്തിയത്. ബിഹൈൻഡ്വുഡ്‌സ് ഐസിനു നല്‍കിയ അഭിമുഖത്തില്‍ ആണ് ജയറാം ഈ കാര്യം പറഞ്ഞത്.

അനൂപ് പറഞ്ഞ കഥ കേട്ട മാളവിക അന്ന് പറഞ്ഞത് കഥ നന്നായിട്ടുണ്ടെന്നും എന്നാല്‍ ഒരു സിനിമ ചെയ്യാന്‍ താന്‍ മാനസികമായി തയ്യാറല്ല എന്നുമാണെന്നും ജയറാം പറഞ്ഞു. അതിനു ശേഷം മാളവികയെ ചെറുപ്പം മുതൽ തന്നെ അറിയാവുന്ന ജയം രവി ഒരു സിനിമയിലേക്ക് മാളവികയെ വിളിച്ചിരുന്നു എന്നും, പക്ഷെ അതും ചെയ്തില്ല എന്നും ജയറാം കൂട്ടിച്ചേർത്തു. ഇപ്പോള്‍ തെലുങ്കിലും തമിഴിലുമൊക്കെയായി കുറേ കഥ മാളവിക കേട്ടിട്ടുണ്ട് എന്നും വെളിപ്പെടുത്തിയ ജയറാം, ഈ വര്‍ഷം തന്നെ ഏതെങ്കിലും ഒരു പടം ചെയ്യുമെന്നാണ് പ്രതീക്ഷിക്കുന്നത് എന്നും കൂട്ടിച്ചേർക്കുന്നു. സത്യൻ അന്തിക്കാട് ഒരുക്കിയ മകൾ എന്ന ചിത്രമാണ് ഇനി ജയറാം അഭിനയിച്ചു പുറത്തു വരാനുള്ളത്.