ദളപതിയോടു ഏറ്റു മുട്ടാൻ റോക്കി ഭായിയെ വിറപ്പിച്ച അധീരാ ?

ദളപതി വിജയ് ഇപ്പോൾ നായകനായി അഭിനയിക്കുന്നത് തെലുങ്കു സംവിധായകൻ വംശി ഒരുക്കുന്ന തമിഴ് ചിത്രത്തിലാണ്. പ്രശസ്ത നിർമ്മാതാവ് ദിൽ രാജു നിർമ്മിക്കുന്ന ഈ ചിത്രത്തിലെ നായികയായി എത്തുന്നത് രശ്‌മിക മന്ദാന ആണ്. വിജയ്‌യുടെ കരിയറിലെ ഏറ്റവും വലിയ ബഡ്ജറ്റിൽ ആണ് ഈ ചിത്രം ഒരുക്കുന്നത് എന്നാണ് വാർത്തകൾ പറയുന്നത്. എന്നാൽ ഇത് കഴിഞ്ഞു വിജയ് അഭിനയിക്കാൻ പോകുന്ന ചിത്രവും ഏകദേശം തീരുമാനം ആയിക്കഴിഞ്ഞു എന്നാണ് സൂചന. മാസ്റ്റർ എന്ന ബ്ലോക്ക്ബസ്റ്റർ ഹിറ്റ് ചിത്രത്തിന് ശേഷം ലോകേഷ് കനകരാജ് – വിജയ് ടീം ഒന്നിക്കുന്ന ചിത്രമായിരിക്കും ഇതെന്നാണ് റിപ്പോർട്ടുകൾ വരുന്നത്. ഈ ചിത്രം നിർമ്മിക്കുന്നത് ലളിത് കുമാറിന്റെ സെവൻ സ്ക്രീൻ സ്റ്റുഡിയോയും മാസ്റ്റർ നിർമ്മാതാവ് സേവ്യർ ബ്രിട്ടോയും ചേർന്നാണ് എന്നും, അതുപോലെ മാസ്റ്റർ ഷൂട്ടിംഗ് ആരംഭിച്ച ഒക്ടോബർ മൂന്നിന് തന്നെ ഈ ചിത്രവും ആരംഭിക്കുമെന്നും വാർത്തകൾ പറയുന്നു.

എന്നാൽ ഇപ്പോൾ വരുന്ന ഏറ്റവും വലിയ വാർത്ത അതൊന്നുമല്ല. ഈ ചിത്രത്തിലെ വില്ലനെ തേടുന്ന അണിയറ പ്രവർത്തകർ, ഏറ്റവും പുതിയതായി സമീപിച്ചിരിക്കുന്നത് കെ ജി എഫ് 2 എന്ന ചിത്രത്തിലെ അധീരാ എന്ന വില്ലൻ ആയി എത്തിയ ബോളിവുഡ് താരം സഞ്ജയ് ദത്തിനെ ആണെന്നാണ് വാർത്തകൾ പറയുന്നത്. അദ്ദേഹം ഇതിൽ ഉണ്ടാകുമോ എന്നത് സ്ഥിതീകരിച്ചിട്ടില്ല എങ്കിലും, സഞ്ജയ് ദത് വന്നാൽ വിജയ്- ലോകേഷ് കനകരാജ് ചിത്രം കൂടുതൽ വലുതാകും എന്നുറപ്പാണ്. കെ ജി എഫ് 2 ന്റെ മഹാവിജയത്തിനു ശേഷം സഞ്ജയ് ദത് കൂടുതൽ തെന്നിന്ത്യൻ ചിത്രങ്ങൾ ചെയ്യാൻ തീരുമാനിച്ചിട്ടുണ്ടെന്നും സൂചനയുണ്ട്.