ടോവിനോയുടെ വില്ലൻ വേഷം കാണാൻ ആരാധകർ; വമ്പൻ റിലീസായി മാരി 2 എത്തുന്നു..!!

ധനുഷ്- ടോവിനോ ചിത്രമായ മാരി 2 ഈ വരുന്ന വെള്ളിയാഴ്ച കേരളത്തിലെ തീയേറ്ററുകളിൽ എത്തുകയാണ്. വമ്പൻ റിലീസ് ആയി കേരളത്തിൽ എത്തുന്ന ഈ ചിത്രത്തിന്റെ ഏറ്റവും വലിയ ആകർഷണം മലയാളത്തിന്റെ യുവ താരമായ ടോവിനോ തോമസിന്റെ വില്ലൻ വേഷം തന്നെയാണ്. ഭീജ അഥവാ താനാറ്റോസ് എന്ന നെഗറ്റീവ് കഥാപാത്രത്തെയാണ് ടോവിനോ തോമസ് ഈ ചിത്രത്തിൽ അവതരിപ്പിക്കുന്നത്. ഇതിലെ വില്ലൻ ഗെറ്റപ്പിൽ ഉള്ള  ടോവിനോയുടെ കിടിലൻ സ്റ്റില്ലുകളും പോസ്റ്ററുകളും സോഷ്യൽ മീഡിയയിൽ ഏറെ വൈറൽ ആണ്. അതോടൊപ്പം തന്നെ ട്രൈലെർ നമ്മുക്ക് സമ്മാനിച്ച രംഗങ്ങളും ഈ ചിത്രത്തിലെ ടോവിനോയുടെ കഥാപാത്രത്തെ കുറിച്ച് ഏറെ പ്രതീക്ഷകൾ ആണ് സമ്മാനിക്കുന്നത്.

ഒരു നടൻ എന്ന നിലയിൽ ഓരോ ചിത്രത്തിലൂടെയും തന്റെ വളർച്ച നമ്മുക്ക് കാണിച്ചു തരുന്ന ഈ യുവ നടൻ വില്ലൻ വേഷത്തിൽ തകർക്കുന്നത് കാണാൻ കാത്തിരിക്കുകയാണ് പ്രേക്ഷകർ. ധനുഷ് നായകനായി എത്തുന്ന ഈ ചിത്രത്തിലെ നായികാ വേഷം ചെയ്യുന്നത് പ്രേമത്തിലൂടെ ശ്രദ്ധേയയായ സായി പല്ലവി ആണ്. ബാലാജി മോഹൻ സംവിധാനം ചെയ്ത ഈ ചിത്രം രചിച്ചിരിക്കുന്നതും അദ്ദേഹം ആണ്. വണ്ടർ ബാർ സ്റ്റുഡിയോയുടെ ബാനറിൽ ധനുഷ് തന്നെയാണ് ഈ ചിത്രം നിർമ്മിച്ചിരിക്കുന്നതും. യുവാൻ ശങ്കർ രാജയുടെ സംഗീതവും ഏറെ ശ്രദ്ധ നേടിയെടുക്കുന്നുണ്ട്. സൂപ്പർ ഹിറ്റായ മാരിയുടെ രണ്ടാം ഭാഗം എന്ന നിലയിൽ പ്രേക്ഷകർക്ക് ഈ ചിത്രത്തിലുള്ള പ്രതീക്ഷ വളരെ മുകളിലുമാണ്. വരലക്ഷ്മി ശരത് കുമാർ, കൃഷ്ണ കുലശേഖരൻ, വിദ്യ പ്രദീപ്, റോബോ ശങ്കർ, കല്ലൂരി വിനോദ് എന്നിവരും ഈ ചിത്രത്തിന്റെ താര നിരയിൽ ഉണ്ട്.