ഇരുപതാം നൂറ്റാണ്ടിലെ മോഹൻലാലിനെ അനുസ്മരിപ്പിച്ചു ഇരുപത്തിയൊന്നാം നൂറ്റാണ്ടിലെ പ്രണവിന്റെ ഫസ്റ്റ് ലുക്ക്..!

മലയാള സിനിമാ പ്രേമികളും ആരാധകരും ഏറെ ആവേശത്തോടെ കാത്തിരുന്ന പ്രണവ് മോഹൻലാൽ ചിത്രമായ ഇരുപത്തിയൊന്നാം നൂറ്റാണ്ടിന്റെ ഫസ്റ്റ് ലുക്ക് പോസ്റ്റർ ഇന്ന് റിലീസ് ചെയ്തു. മോഹൻലാൽ, പീറ്റർ ഹെയ്‌ൻ, ആന്റണി പെരുമ്പാവൂർ, നിവിൻ പോളി, ടോവിനോ തോമസ്, ആസിഫ് അലി, അജു വർഗീസ്, ഗോകുൽ സുരേഷ് തുടങ്ങി ഒട്ടേറെ പേർ ഷെയർ ചെയ്ത ഈ പോസ്റ്റർ ഇപ്പോൾ സോഷ്യൽ മീഡിയയിൽ തരംഗമായി കഴിഞ്ഞു. കിടിലൻ ലുക്കിൽ ആണ് ഈ ഫസ്റ്റ് ലുക്ക് പോസ്റ്ററിൽ പ്രണവ് മോഹൻലാൽ പ്രത്യക്ഷപ്പെട്ടിരിക്കുന്നത്. 31 വർഷം മുൻപ് റിലീസ് ചെയ്ത മോഹൻലാൽ-കെ മധു ചിത്രമായ ഇരുപതാം നൂറ്റാണ്ടിലെ മോഹൻലാലിന്റെ ലുക്കിനെ അനുസ്മരിപ്പിക്കുന്നു ഇരുപത്തിയൊന്നാം നൂറ്റാണ്ട് എന്ന ഈ അരുൺ ഗോപി ചിത്രത്തിലെ പ്രണവിന്റെ ലുക്ക് എന്നാണ് സോഷ്യൽ മീഡിയ അഭിപ്രായപ്പെടുന്നത്.

രാമലീല എന്ന ബ്ലോക്ക്ബസ്റ്ററിനു ശേഷം അരുൺ ഗോപി സംവിധാനം ചെയ്ത ഈ ചിത്രം രചിച്ചിരിക്കുന്നതും അദ്ദേഹം തന്നെയാണ്. പുലി മുരുകൻ, രാമലീല എന്നീ ബ്ലോക്ക്ബസ്റ്ററുകൾ നിർമ്മിച്ച ടോമിച്ചൻ മുളകുപാടം ആണ് ഈ ചിത്രം നിർമ്മിച്ചിരിക്കുന്നത്. ടോമിച്ചൻ- അരുൺ ഗോപി ടീമിന്റെ അടുത്ത ചിത്രം മോഹൻലാലിനെ നായകനാക്കി ആണെന്നതും ശ്രദ്ധേയമാണ്. പീറ്റർ ഹെയ്‌ൻ, സുപ്രീം സുന്ദർ എന്നിവർ ചേർന്ന് സംഘട്ടന രംഗങ്ങൾ ഒരുക്കിയ ഇരുപത്തിയൊന്നാം നൂറ്റാണ്ടിനു സംഗീതം നൽകിയത് ഗോപി സുന്ദർ ആണ്. അഭിനന്ദം രാമാനുജൻ ദൃശ്യങ്ങൾ ഒരുക്കിയ ഈ ചിത്രം എഡിറ്റ് ചെയ്യുന്നത് വിവേക് ഹർഷൻ ആണ്. മനോജ് കെ ജയൻ, കലാഭവൻ ഷാജോൺ, ധർമജൻ ബോൾഗാട്ടി, ജി സുരേഷ് കുമാർ , ഗോകുൽ സുരേഷ്, റേച്ചൽ ഡേവിഡ്, അഭിലാഷ്, ഷാജു ശ്രീധർ, ഇന്നസെന്റ് എന്നിവരും ഈ ചിത്രത്തിന്റെ താര നിരയിൽ ഉണ്ട്.