ആരാധകരെ ആവേശത്തിലാഴ്ത്തി ഇരുപത്തിയൊന്നാം നൂറ്റാണ്ട് ഫസ്റ്റ് ലുക്ക് പോസ്റ്റർ എത്തി..!

ആദി എന്ന ബ്ലോക്ക്ബസ്റ്റർ ചിത്രത്തിലൂടെ നായകനായി അരങ്ങേറിയ പ്രണവ് മോഹൻലാൽ നായകനായ രണ്ടാമത്തെ ചിത്രമാണ് ഇരുപത്തിയൊന്നാം നൂറ്റാണ്ട്. ഈ ചിത്രത്തിന്റെ കിടിലൻ ഫസ്റ്റ് ലുക്ക് പോസ്റ്റർ ഇപ്പോൾ എത്തി കഴിഞ്ഞു. ആരാധകർക്ക് ആവേശം സമ്മാനിക്കുന്ന ഒരു പോസ്റ്റർ ആണ് ഇപ്പോൾ റിലീസ് ചെയ്തിരിക്കുന്നത്. രാമലീലക്ക് ശേഷം അരുൺ ഗോപി സംവിധാനം ചെയ്യുന്ന ഈ ചിത്രം മുളകുപാടം ഫിലിമ്സിന്റെ ബാനറിൽ ടോമിച്ചൻ മുളകുപാടം ആണ് നിർമ്മിക്കുന്നത്. ആദിയിൽ നിന്ന് വ്യത്യസ്തമായ ഒരു ലുക്കിൽ ആണ് പ്രണവ് ഈ ചിത്രത്തിൽ എത്തുന്നത്. ആദിയിലെ പോലെ തന്നെ ഇതിലും പ്രണവിന്റെ കിടിലൻ സ്റ്റണ്ട് രംഗങ്ങൾ ഉണ്ടാകും എന്നാണ്  റിപ്പോർട്ടുകൾ  പറയുന്നത്.

സർഫിങ്ങിലെ വിസ്മയ കാഴ്ചകൾ നമ്മുക്ക് സമ്മാനിക്കാനാണ് പ്രണവ് മോഹൻലാൽ ഈ ചിത്രത്തിലൂടെ ഒരുങ്ങുന്നത് എന്നാണ് സൂചന. കൂടാതെ പീറ്റർ ഹെയ്‌ൻ ഒരുക്കുന്ന സ്റ്റണ്ട് രംഗങ്ങൾ വേറെയും. ഇൻഡോനേഷ്യയിലെ ബാലിയിൽ പോയി സർഫിങ് പഠിച്ച പ്രണവിന്റെ കിടിലൻ  സർഫിങ് രംഗങ്ങൾ ആവും ഈ അരുൺ ഗോപി ചിത്രത്തിന്റെ ഹൈലൈറ്റ് എന്ന് റിപ്പോർട്ടുകൾ ഉണ്ട്. അരുൺ ഗോപി തന്നെ തിരക്കഥ രചിച്ച ഈ ചിത്രം  അടുത്ത വർഷം ജനുവരിയിൽ റിലീസ് ചെയ്യാൻ പാകത്തിനാണ് പോസ്റ്റ് പ്രൊഡക്ഷൻ ജോലികൾ നടക്കുന്നത്. മനോജ് കെ ജയൻ, കലാഭവൻ ഷാജോൺ, ധർമജൻ ബോൾഗാട്ടി, ജി സുരേഷ് കുമാർ എന്നിവരും അഭിനയിക്കുന്ന ഈ ചിത്രത്തിൽ പുതുമുഖമായ റേച്ചൽ ആണ് നായികാ വേഷത്തിൽ എത്തുന്നത്. ഡ്യൂപ് ഇല്ലാതെ വിസ്മയിപ്പിക്കുന്ന സംഘട്ടന രംഗങ്ങൾ ആയിരുന്നു ആദി എന്ന ജീത്തു ജോസെഫ് ചിത്രത്തിന് വേണ്ടി പ്രണവ് കാഴ്ച വെച്ചത് എന്നത് കൊണ്ട് തന്നെ ഇരുപത്തിയൊന്നാം നൂറ്റാണ്ടിലെ ഫൈറ്റ് രംഗങ്ങളെ കുറിച്ചും വമ്പൻ പ്രേക്ഷക പ്രതീക്ഷയാണ് ഉള്ളത്.