ബ്രോ ഡാഡി കണ്ട മമ്മൂട്ടി പറഞ്ഞത്; ലാലു അലക്സ് വെളിപ്പെടുത്തുന്നു..!

കംപ്ലീറ്റ് ആക്ടർ മോഹൻലാലിനെ നായകനാക്കി പൃഥ്വിരാജ് സുകുമാരൻ സംവിധാനം ചെയ്ത ചിത്രമാണ് ബ്രോ ഡാഡി. നേരിട്ടുള്ള ഒടിടി റിലീസ് ആയി ഡിസ്‌നി പ്ലസ് ഹോട്ട് സ്റ്റാറിൽ എത്തിയ ബ്രോ ഡാഡി പാൻ ഇന്ത്യൻ ലെവലിൽ ആണ് സൂപ്പർ ഹിറ്റായി മാറിയത്. ശ്രീജിത്ത്, ബിബിൻ എന്നിവർ രചിച്ച ഈ ഫാമിലി കോമഡി എന്റെർറ്റൈനെർ ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമ്മിച്ചത്. മോഹൻലാൽ, ലാലു അലക്സ് എന്നിവർ നടത്തിയ ഗംഭീര കോമഡി പ്രകടനമാണ് ഈ ചിത്രത്തിന്റെ ഏറ്റവും വലിയ ഹൈലൈറ്റ്. മാത്രമല്ല, ഇതിനോടകം രണ്ടു ഓൾ ടൈം റെക്കോർഡുകൾ ആണ് ഈ ചിത്രം ഹോട്ട് സ്റ്റാറിൽ സൃഷ്ടിച്ചത്. ഏറ്റവും കൂടുതൽ സബ്സ്ക്രിപ്ഷൻ റിലീസിന്റെ ആദ്യ ദിനം തന്നെ ഹോട്ട് സ്റ്റാറിന് നേടിക്കൊടുത്ത ഇന്ത്യൻ ചിത്രവും, ഏറ്റവും കൂടുതൽ ആളുകൾ ആദ്യ ദിനം ഹോട്ട് സ്റ്റാറിൽ കണ്ട രണ്ടാമത്തെ ഇന്ത്യൻ ചിത്രവും ഇപ്പോൾ ബ്രോ ഡാഡി എന്ന മലയാള ചിത്രമാണ്.

ഇപ്പോഴിതാ പാൻ ഇന്ത്യൻ ലെവലിൽ അഭിനന്ദനം ഒഴുകിയെത്തുന്ന ഈ ചിത്രം കണ്ടിട്ട് മലയാളത്തിന്റെ മെഗാ സ്റ്റാർ മമ്മൂട്ടി പറഞ്ഞ വാക്കുകൾ വെളിപ്പെടുത്തുകയാണ് നടൻ ലാലു അലക്സ്. ദി ക്യൂ ചാനലിന് വേണ്ടി മനീഷ് നാരായണൻ നടത്തിയ അഭിമുഖത്തിലാണ് ലാലു അലക്സ് ഈ കാര്യം വെളിപ്പെടുത്തിയത്. മമ്മൂട്ടിയുടെ ആദ്യത്തെ മെസേജ് ചിത്രത്തിന്റെ വിജയത്തെ കുറിച്ചു താൻ കേട്ടു, ഇനി കാണും എന്നായിരുന്നു എന്ന് ലാലു അലക്സ് പറഞ്ഞു. അതിനു ശേഷം പടം കണ്ട മമ്മൂട്ടി പിന്നീട് അയച്ച മെസേജ്, തകർത്തു എന്നാണെന്നും ലാലു അലക്സ് പറയുന്നു. അതുപോലെ ബ്രോ ഡാഡിയിലെ ഒരു സീൻ അഭിനയിച്ചു കഴിഞ്ഞപ്പോൾ മോഹൻലാൽ തന്റെ പ്രകടനത്തെ കുറിച്ചു തന്നോട് പറഞ്ഞത് ഗംഭീരമല്ല, അതിഗംഭീരമാണ് പെർഫോമൻസ് എന്നാണെന്നും അദ്ദേഹം വെളിപ്പെടുത്തി. കുര്യൻ മാളിയേക്കൽ എന്ന കഥാപാത്രമായാണ് ലാലു അലക്സ് ഈ ചിത്രത്തിൽ അഭിനയിച്ചത്. മോഹൻലാൽ, ലാലു അലക്സ് എന്നിവരെ കൂടാതെ, പൃഥ്വിരാജ് സുകുമാരൻ, മീന, കല്യാണി പ്രിയദർശൻ, കനിഹ, സൗബിൻ ഷാഹിർ, മല്ലിക സുകുമാരൻ, ഉണ്ണി മുകുന്ദൻ എന്നിവരും ഈ ചിത്രത്തിന്റെ താരനിരയിൽ ഉണ്ട്.