അസുരനിലെ ധനുഷിന്റെ അസാധ്യ പ്രകടനം കണ്ട് അമ്പരന്ന് ഐശ്വര്യയും, ജോജുവും അടങ്ങുന്ന സംഘം!!

പേട്ട എന്ന സൂപ്പർ ഹിറ്റ് ചിത്രം ഒരുക്കിയതിനു ശേഷം കാർത്തിക് സുബ്ബരാജ് സംവിധാനം ചെയ്യുന്ന പുതിയ ചിത്രം ലണ്ടനിൽ പുരോഗമിക്കുകയാണ്. ധനുഷ് നായകനായി എത്തുന്ന ഈ ചിത്രത്തിൽ മലയാള താരങ്ങൾ ആണ് നിർണ്ണായകമായ മറ്റു രണ്ടു വേഷങ്ങൾ അവതരിപ്പിക്കുന്നത്. ചുരുങ്ങിയ കാലം കൊണ്ട് തന്നെ മലയാള സിനിമയിൽ തന്റേതായ സ്ഥാനം നേടിയെടുത്ത ഐശ്വര്യ ലക്ഷ്മിയും, ജോജു ജോർജും ആണ് ആ താരങ്ങൾ.

കഴിഞ്ഞ ദിവസം കാർത്തിക്ക് സുബ്ബരാജ് ചിത്രത്തിന്റെ ടീമിലെ അംഗങ്ങൾക്കായി ധനുഷിന്റെ ഏറ്റവും പുതിയ ചിത്രം അസുരന്റെ പ്രത്യേക പ്രദർശനം ലണ്ടനിൽ ഒരുക്കിയിരുന്നു. കാർത്തിക്കിനും മറ്റു അണിയറ പ്രവർത്തകർക്കുമൊപ്പം അസുരൻ കാണാൻ പോയ ജോജുവും ഐശ്വര്യയും അതിലെ ധനുഷിന്റെ പ്രകടനം കണ്ടമ്പരന്നിരിക്കുകയാണ്.

അസുരൻ കണ്ട ഐശ്വര്യ ലക്ഷ്മി മികച്ച അഭിപ്രായം ആണ് തന്റെ സോഷ്യൽ മീഡിയ അക്കൗണ്ടിലൂടെ പങ്കു വെച്ചിരിക്കുന്നത്. ധനുഷിനൊപ്പം അഭിനയിക്കുന്നതിൽ ഏറെ അഭിമാനം ഉണ്ടെന്നും നടി കൂട്ടിച്ചേർത്തു. ആഗോള തലത്തിൽ ഗംഭീര അഭിപ്രായം നേടുന്ന അസുരൻ സംവിധാനം ചെയ്തത് വെട്രിമാരൻ ആണ്. മലയാളത്തിന്റെ ലേഡി സൂപ്പർ സ്റ്റാർ ആയ മഞ്ജു വാര്യർ ആണ് അസുരനിലെ നായികാ വേഷം ചെയ്തിരിക്കുന്നത്.

ഗ്യാങ്സ്റ്റർ ത്രില്ലറായി ഒരുങ്ങുന്ന കാർത്തിക് സുബ്ബരാജ് ചിത്രത്തിൽ ധനുഷിന്റെ നായികയായാണ് ഐശ്വര്യ എത്തുന്നത്. ജോസെഫ്, പൊറിഞ്ചു മറിയം ജോസ് എന്നീ ചിത്രങ്ങളിലൂടെ താര പദവി നേടിയെടുത്ത ജോജു തന്റെ ആദ്യ തമിഴ് ചിത്രത്തിൽ പ്രധാനപ്പെട്ട ഒരു കഥാപാത്രത്തിന് ആണ് ജീവൻ നൽകുന്നത് എന്നാണ് സൂചന. ഹോളിവുഡ് താരം ജെയിംസ് കോസ്മോ ചിത്രത്തിൽ ഒരു പ്രധാന വേഷം അവതരിപ്പിക്കുന്നുണ്ട്. ബ്രെവ്ഹാർട്ട്, ട്രോയ് തുടങ്ങി പ്രശസ്ത ടീ. വി ഷോ ഗെയിം ഓഫ് ത്രോൻസിലും ഭാഗമായിരുന്നു ജെയിംസ് കോസ്മോ.

ഈ ചിത്രത്തിന്റെ കൂടുതൽ ഭാഗവും വിദേശത്താണ് ചിത്രീകരിക്കുക. ഹോളിവുഡ് താരം ജെയിംസ് കോസ്മോ ചിത്രത്തിൽ ഒരു പ്രധാന വേഷം അവതരിപ്പിക്കുന്നുണ്ട്. ധനുഷിനൊപ്പം ജോജു ജോർജ്, ഐശ്വര്യ ലക്ഷ്മി എന്നീ താരങ്ങൾ ഒരുമിക്കുന്നു എന്നതാണ് തന്നെയാണ് ഈ ചിത്രത്തെ കാത്തിരിക്കാൻ മലയാളി പ്രേക്ഷകരെ പ്രേരിപ്പിക്കുന്ന ഏറ്റവും വലിയ ഘടകം.