ദളപതിയുടെ അച്ഛൻ ഒരുക്കുന്ന കേപ്പ് മാരി കേരളത്തിൽ എത്തിക്കാൻ സൂര്യ ഫിലിംസ്

ദളപതി വിജയ്‌യുടെ അച്ഛൻ എസ് എ ആചന്ദ്രശേഖർ സംവിധാനം ചെയ്ത തമിഴ് ചിത്രമാണ് കേപ്പ് മാരി. പ്രശസ്ത തമിഴ് യുവ താരം ജയ് നായകനായി എത്തുന്ന ഈ റൊമാന്റിക് കോമഡി ചിത്രത്തിന്റെ ട്രൈലെർ പുറത്തു വരികയും മികച്ച പ്രതികരണം നേടിയെടുക്കുകയും ചെയ്തിരുന്നു. അതുല്യ രവി നായികാ വേഷം ചെയ്യുന്ന ഈ ചിത്രം കേരളത്തിൽ എത്തിക്കുന്നത് സൂര്യ ഫിലിംസ് ആണ്. വൈഭവി ശാണ്ഡില്യ, സിദ്ധാർഥ് വിപിൻ, സത്യൻ, ദേവദർശിനി, പവർ സ്റ്റാർ എന്നിവരും അഭിനയിക്കുന്ന ഈ ചിത്രം എസ് എ ചന്ദ്രശേഖറിന്റെ എഴുപതാമത്തെ ചിത്രമാണ്. സംവിധായകൻ തന്നെ കഥയും രചിച്ച ഈ ചിത്രത്തിന് വേണ്ടി സംഭാഷണങ്ങൾ ഒരുക്കിയത് അദ്ദേഹവും ജീവൻ, മദൻ എന്നിവരും ചേർന്നാണ്.

ജീവൻ ക്യാമറ ചലിപ്പിച്ച ഈ ചിത്രത്തിന് വേണ്ടി സംഗീതം ഒരുക്കിയിരിക്കുന്നത് സിദ്ധാർത് വിപിൻ ആണ്. ചിത്രത്തിലെ നായകനായ ജയ്‍യുടെ ഇരുപത്തിയഞ്ചാമത്തെ ചിത്രമാണ് കേപ്പ് മാരി. ജി കെ പ്രസന്ന എഡിറ്റിംഗ് നിർവഹിച്ചിരിക്കുന്ന ഈ ചിത്രം നിർമ്മിച്ചിരിക്കുന്നത് ഗ്രീൻ സിഗ്നൽ എന്ന പ്രൊഡക്ഷൻ ബാനർ ആണ്. ഈ ചിത്രം കേരളത്തിൽ വിതരണം ചെയ്യുന്ന സുനിൽ എ കെ തൃശൂരിലെ പ്രശസ്തമായ രാഗം തീയേറ്റർ ഉടമ കൂടിയാണ്. ഈ വർഷത്തെ സൂപ്പർ ഹിറ്റ് മലയാള ചിത്രങ്ങളിൽ ഒന്നായ വിജയ് സൂപ്പറും പൗര്ണമിയും നിർമ്മിച്ചതും സുനിൽ എ കെ ആണ്. മധുര രാജ എന്ന വൈശാഖ്- മമ്മൂട്ടി ചിത്രത്തിലൂടെ മലയാളത്തിലും അഭിനയിച്ചിട്ടുള്ള നടൻ ആണ് ജയ്.