പ്രതി പൂവൻ കോഴിയുടെ ട്രൈലെർ എത്തുന്നു; റിലീസ് ചെയ്യുന്നത് ദുൽഖർ സൽമാൻ

റോഷൻ ആൻഡ്രൂസ് സംവിധാനം ചെയ്തു മഞ്ജു വാര്യർ നായികാ വേഷം ചെയ്യുന്ന പുതിയ ചിത്രമായ പ്രതി പൂവൻ കോഴി ഈ വരുന്ന ക്രിസ്മസിന് തീയേറ്ററുകളിൽ എത്തും. ഉണ്ണി ആർ രചന നിർവഹിച്ച ഈ ചിത്രത്തിന്റെ ട്രൈലെർ ഡിസംബർ 1 ഞായറാഴ്ച രാവിലെ 11 മണിക്ക് റിലീസ് ചെയ്യും. യുവ താരം ദുൽഖർ സൽമാൻ ആണ് തന്റെ ഒഫീഷ്യൽ ഫേസ്ബുക് പേജിലൂടെ ഈ ട്രൈലെർ പുറത്തു വിടുന്നത്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ നിർമ്മിച്ച ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തത് കംപ്ലീറ്റ് ആക്ടർ മോഹൻലാൽ ആയിരുന്നു.

ഇതിലെ ഒരു വീഡിയോ സോങ് നിവിൻ പോളി റിലീസ് ചെയ്തപ്പോൾ ഈ ചിത്രത്തിലൂടെ നടനായി അരങ്ങേറുന്ന റോഷൻ ആൻഡ്രൂസിന്റെ പോസ്റ്റർ റിലീസ് ചെയ്തത് മെഗാസ്റ്റാർ മമ്മൂട്ടി ആണ്. ഉണ്ണി ആർ രചിച്ച പ്രതി പൂവൻ കോഴി എന്ന പ്രശസ്ത നോവലും ആയി ഇതിനു ബന്ധമൊന്നുമില്ല എന്നും ആ ടൈറ്റിൽ മാത്രമേ ഉപയോഗിച്ചിട്ടുള്ളു എന്നും റോഷൻ ആൻഡ്രൂസ് പറഞ്ഞിട്ടുണ്ട്. അനുശ്രീ, അലെൻസിയർ, സൈജു കുറുപ്പ് തുടങ്ങിയവരും അഭിനയിക്കുന്ന ഈ ചിത്രത്തിൽ പ്രതിനായകൻ ആയാണ് റോഷൻ ആൻഡ്രൂസ് അഭിനയിക്കുന്നത്. കായംകുളം കൊച്ചുണ്ണി എന്ന നിവിൻ പോളി- മോഹൻലാൽ ചിത്രത്തിന്റെ വമ്പൻ വിജയത്തിന് ശേഷം റോഷൻ ഒരുക്കിയ ചിത്രമാണ് ഇത്. മഞ്ജു വാര്യരെ നായികയാക്കി ഇതിനു മുൻപ് റോഷൻ ഒരുക്കിയ ചിത്രമാണ് ഹൗ ഓൾഡ് ആർ യു. അഞ്ചു വർഷം മുൻപ് റിലീസ് ചെയ്ത ആ ചിത്രത്തിലൂടെ ആണ് മഞ്ജു അഭിനയ ജീവിതത്തിലേക്ക് മടങ്ങിയെത്തിയത്.