മെഗാ സ്റ്റാറിനെ കാണാൻ തമിഴ് നാട്ടിൽ ജനസാഗരം; പേരൻപ്​ ടീസർനു വമ്പൻ സ്വീകരണം

പ്രേക്ഷകർ ഏറെ കാത്തിരുന്ന പേരന്പ് എന്ന തമിഴ് ചിത്രത്തിന്റെ ടീസർ ഇന്ന് ചെന്നൈയിൽ വെച്ച് ചിത്രത്തിലെ നായകനായ മമ്മൂട്ടി റിലീസ് ചെയ്തു. അതിനൊപ്പം തന്നെ ചിത്രത്തിന്റെ ഓഡിയോ ലോഞ്ചും അവിടെ വെച്ച് തന്നെ നടന്നു. മെഗാ സ്റ്റാർ മമ്മൂട്ടിയെ കാണാൻ വലിയ ജനസാഗരം തന്നെയാണ് അവിടെ എത്തിച്ചേർന്നത്. ദേശീയ അവാർഡ് ജേതാവായ റാം സംവിധാനം ചെയ്ത ഈ ചിത്രം വിവിധ ചലച്ചിത്ര മേളകളിൽ പ്രദർശിപ്പിച്ചു സിനിമാ പ്രേമികളുടെ കയ്യടി നേടിയെടുത്തിരുന്നു. അടുത്ത മാസം ആദ്യം ആയിരിക്കും ഈ ചിത്രത്തിന്റെ തിയേറ്റർ റിലീസ് എന്നാണ് സൂചന. മെഗാ സ്റ്റാർ മമ്മൂട്ടിയുടെ അഭിനയ ജീവിതത്തിലെ മികച്ച കഥാപാത്രങ്ങളിൽ ഒന്നായിരിക്കും ഈ ചിത്രത്തിലെ അമുദവൻ എന്നാണ് റിപ്പോർട്ടുകൾ പറയുന്നത്.

ഈ ചിത്രം കണ്ട ഒരുപാട് തമിഴ് സെലിബ്രിറ്റികൾ ചിത്രത്തെ കുറിച്ചും മമ്മൂട്ടിയുടെ പ്രകടനത്തെ കുറിച്ചും ഗംഭീര അഭിപ്രായം ആണ് പറഞ്ഞത്. പി സി ശ്രീറാം, സിദ്ധാർഥ്, സൂരി തുടങ്ങിയവർ ഒക്കെ ഈ ചിത്രത്തെ കുറിച്ച് ട്വിറ്റെർ വഴി പോസ്റ്റ് ചെയ്തിരുന്നു. തങ്ക മീങ്കൽ എന്ന ചിത്രത്തിലൂടെ പ്രശസ്തയായ സാധന ഈ ചിത്രത്തിൽ മമ്മൂട്ടിയോടൊപ്പം തുല്യ പ്രാധാന്യമുള്ള ഒരു കഥാപാത്രത്തെ അവതരിപ്പിച്ചിരിക്കുന്നു. മമ്മൂട്ടി കഥാപാത്രത്തിന്റെ മകൾ ആയാണ് ഈ ചിത്രത്തിൽ സാധന എത്തിയിരിക്കുന്നത്. സാധനയുടെയും കരിയർ ബെസ്റ്റ് പെർഫോമൻസ് ആണ് ഈ ചിത്രത്തിലേതു എന്നാണ് സൂചന. അഞ്ജലി, സുരാജ് വെഞ്ഞാറമ്മൂട്, സമുദ്രക്കനി എന്നിവരും ഈ ചിത്രത്തിൽ അഭിനയിച്ചിട്ടുണ്ട്. ചിത്രത്തിന്റെ ടീസറിന് ഗംഭീര വരവേൽപ്പാണ് സോഷ്യൽ മീഡിയയിൽ നിന്ന് ലഭിക്കുന്നത്. മെഗാ സ്റ്റാർ മമ്മൂട്ടിയുടെ അവിസ്മരണീയ അഭിനയ മുഹൂർത്തങ്ങൾ ഇനി ബിഗ് സ്‌ക്രീനിൽ കാണാൻ ഉള്ള കാത്തിരിപ്പിലാണ് ആരാധകരും സിനിമാ പ്രേമികളും