കേരളത്തിൽ പേമാരിയായി പെയ്യാൻ മാരി 2 നാളെ മുതൽ; തിയേറ്റർ ലിസ്റ്റ് എത്തി..!

തമിഴ് യുവ താരം ധനുഷും മലയാളത്തിന്റെ യുവ താരം ടോവിനോ തോമസും ഒന്നിച്ച മാരി 2 എന്ന തമിഴ് ചിത്രം നാളെ മുതൽ കേരളത്തിലെ തീയേറ്ററുകളിൽ എത്തുകയാണ്. പക്കാ മാസ്സ് എന്റെർറ്റൈനെർ ആയി ഒരുക്കിയിരിക്കുന്ന ഈ ചിത്രത്തിൽ ടോവിനോ തോമസ് വില്ലൻ ആയാണ് എത്തിയിരിക്കുന്നത്. മൂന്നു വർഷം മുൻപേ റിലീസ് ചെയ്ത മാരി എന്ന ചിത്രത്തിന്റെ രണ്ടാം ഭാഗം ആയി ഈ ചിത്രം  രചിച്ചു സംവിധാനം ചെയ്തിരിക്കുന്നത് ആ ചിത്രം ഒരുക്കിയ ബാലാജി മോഹൻ തന്നെയാണ്. വണ്ടർ ബാർ ഫിലിമ്സിന്റെ ബാനറിൽ ധനുഷ് തന്നെ നിർമ്മിച്ച ഈ ചിത്രം കേരളത്തിൽ വമ്പൻ റിലീസ് ആയി എത്തിക്കുന്നത് എസ് വിനോദ് കുമാർ, സുകുമാരൻ തെക്കേപ്പാട്ടു എന്നിവരുടെ നേതൃത്വത്തിലുള്ള മിനി സ്റ്റുഡിയോ ആണ്. കാല , വട ചെന്നൈ തുടങ്ങിയ തമിഴ് ചിത്രങ്ങൾ ഇവിടെ എത്തിച്ചതും അവരാണ്.

മാരി 2 ന്റെ തിയേറ്റർ ലിസ്റ്റ് ഇവിടെ ചേർക്കുന്നു. പ്രേമത്തിലൂടെ മലയാളി പ്രേക്ഷകരുടെ പ്രിയങ്കരി ആയി മാറിയ സായി പല്ലവിയാണ് ഈ ചിത്രത്തിലെ നായികാ വേഷം  ചെയ്യുന്നത്. ഇവരെ  കൂടാതെ വരലക്ഷ്മി ശരത് കുമാർ, കൃഷ്ണ കുലശേഖരൻ, വിദ്യ പ്രദീപ്, റോബോ ശങ്കർ, കല്ലൂരി വിനോദ് എന്നിവരും ഈ ചിത്രത്തിന്റെ താര നിരയിൽ ഉണ്ട്. യുവാൻ ശങ്കർ രാജയാണ് ഈ ചിത്രത്തിന് വേണ്ടി സംഗീതം ഒരുക്കിയിരിക്കുന്നത്. ടോവിനോയുടെ കട്ട വില്ലത്തരവും ധനുഷിന്റെ കിടിലൻ ഹീറോയിസവും കാണാൻ ഉള്ള കാത്തിരിപ്പിലാണ് മലയാളി  പ്രേക്ഷകർ ഇപ്പോൾ. ടോവിനോ ഭീജ എന്ന കഥാപാത്രം ആയി എത്തുമ്പോൾ സായി പല്ലവി എത്തുന്നത് ആനന്ദി ആയാണ്.