മെഗാ മാസ്സ് ലുക്കിൽ മെഗാ സ്റ്റാർ; ഭീഷ്മ പർവ്വം മമ്മൂട്ടി പോസ്റ്റർ എത്തി..!

മമ്മൂട്ടി ആരാധകർക്ക് ആവേശമേകി കൊണ്ട് മെഗാ സ്റ്റാർ മമ്മൂട്ടിയുടെ ഏറ്റവും പുതിയ ചിത്രമായ ഭീഷ്മ പർവ്വത്തിലെ മമ്മൂട്ടിയുടെ കാരക്റ്റർ പോസ്റ്റർ പുറത്തു. കിടിലൻ ലുക്കിലാണ് മമ്മൂട്ടി ഈ ചിത്രത്തിൽ പ്രത്യക്ഷപ്പെടുന്നത്. മൈക്കൽ എന്നാണ് മമ്മൂട്ടിയുടെ കഥാപാത്രത്തിന്റെ പേര് എന്നാണ് ഇന്ന് റിലീസ് ചെയ്ത പോസ്റ്റർ നമ്മളോട് പറയുന്നത്. നീട്ടി വളർത്തിയ മുടിയും കട്ടി താടിയുമായി ഗംഭീര ലുക്കിലാണ് ഈ ചിത്രത്തിലെ നായകനായി മമ്മൂട്ടി എത്തുന്നത്. ഭീഷ്മ വർദ്ധൻ എന്നാണ് ഇതിലെ മമ്മൂട്ടി കഥാപാത്രത്തിന്റെ പേര് എന്ന് നേരത്തെ റിപ്പോർട്ടുകൾ വന്നിരുന്നു എങ്കിലും, ഇപ്പോൾ മൈക്കൽ എന്ന പേരിലുള്ള പോസ്റ്റർ ആണ് അണിയറ പ്രവർത്തകർ പുറത്തു വിട്ടത്. ബിഗ് ബി എന്ന ചിത്രത്തിന് ശേഷം മമ്മൂട്ടിയും അമൽ നീരദും ഒന്നിക്കുന്ന ചിത്രം കൂടിയാണ് ഭീഷ്മ പർവ്വം. അതുകൊണ്ട് തന്നെ വലിയ പ്രതീക്ഷയിൽ ആണ് മമ്മൂട്ടി ആരാധകർ.

ഫെബ്രുവരി ഇരുപത്തിനാലിനു ആണ് ഈ ചിത്രം റിലീസ് ചെയ്യാൻ പോകുന്നത് എന്ന കാര്യം നേരത്തെ തന്നെ പ്രഖ്യാപിച്ചിട്ടുണ്ട്. അമൽ നീരദ് തന്നെയാണ്, അമൽ നീരദ് പ്രൊഡക്ഷൻസ് എന്ന ബാനറിൽ ഈ ചിത്രം നിർമ്മിക്കുന്നതും. ശ്രീനാഥ് ഭാസി, സൗബിൻ ഷാഹിർ, ഫർഹാൻ ഫാസിൽ, വീണ നന്ദകുമാർ, ലെന, ശ്രിന്ദ, ദിലീഷ് പോത്തൻ, സുദേവ് നായർ, ഷൈൻ ടോം ചാക്കോ, നദിയ മൊയ്തു തുടങ്ങി ഒരു വലിയ താരനിര തന്നെ ഈ ചിത്രത്തിൽ അണിനിരക്കുന്നുണ്ട്. സംവിധായകൻ അമൽ നീരദ്, നവാഗതനായ ദേവദത് ഷാജി എന്നിവർ ചേർന്ന് രചിച്ച ഈ ചിത്രത്തിന് ക്യാമറ ചലിപ്പിച്ചത് ആനന്ദ് സി ചന്ദ്രനും സംഗീതമൊരുക്കിയത് സുഷിൻ ശ്യാമുമാണ്. വിവേക് ഹർഷൻ ആണ് ഭീഷ്മ പർവ്വം എഡിറ്റ് ചെയ്യുന്നത്.