വമ്പൻ മേക്കോവറിൽ മോഹൻലാൽ; സോഷ്യൽ മീഡിയയെ ഞെട്ടിച്ചു ബറോസിന്റെ കിടിലൻ ലുക്ക്..!

മലയാളത്തിന്റെ മഹാനടൻ കംപ്ലീറ്റ് ആക്ടർ മോഹൻലാൽ ആദ്യമായി സംവിധാനം ചെയ്യുന്ന ചിത്രമാണ് ബറോസ്, നിധി കാക്കും ഭൂതം. കഴിഞ്ഞ വർഷം ഏപ്രിലിൽ ഷൂട്ടിംഗ് തുടങ്ങിയെങ്കിലും, കോവിഡ് രണ്ടാം തരംഗം ആരംഭിക്കുകയും ഈ ചിത്രത്തിന്റെ ഷൂട്ടിംഗ് മുടങ്ങുകയും ചെയ്‌തിരുന്നു. ഇപ്പോൾ ആ പത്തു ദിവസം ഷൂട്ട് ചെയ്ത സീനുകൾ മുഴുവൻ മാറ്റി, വീണ്ടും ആദ്യം മുതൽ ആരംഭിച്ചിരിക്കുകയാണ് ഈ ചിത്രം. ഷൂട്ടിംഗ് വൈകിയതോടെ താരനിരയിൽ ഉണ്ടായ മാറ്റങ്ങൾ കൊണ്ടാണ് വീണ്ടും ഷൂട്ടിംഗ് ആദ്യം മുതൽ ആരംഭിക്കേണ്ടി വന്നത്. അതുപോലെ ഈ ചിത്രത്തിലെ ടൈറ്റിൽ കഥാപാത്രം ചെയ്യുന്ന മോഹൻലാലിന്റെ ലുക്കിലും മാറ്റങ്ങൾ ഉണ്ടായിരിക്കുകയാണ്. തല മൊട്ടയടിച്ച, പിരിച്ചു വെച്ച മീശയും നീളമുള്ള താടിയുമായി കിടിലൻ മേക്കോവറിലാണ് മോഹൻലാൽ ഈ ചിത്രത്തിൽ ഇനി എത്തുക. ഈ ലുക്കിലുള്ള ആദ്യ പോസ്റ്റർ ന്യൂ ഇയർ സമ്മാനമായി പുറത്തു വരികയും ചെയ്തു.

ഈ പോസ്റ്റർ ഇപ്പോൾ സോഷ്യൽ മീഡിയയിൽ വൈറലായി മാറിക്കഴിഞ്ഞു എന്ന് മാത്രമല്ല, മോഹൻലാലിന്റെ ഈ മേക്കോവർ വലിയ ചർച്ചയുമായി കഴിഞ്ഞു എന്നതാണ് സത്യം. ഒരു ത്രീഡി ഫാന്റസി ഡ്രാമയായി വമ്പൻ ബഡ്ജറ്റിൽ ഒരുങ്ങുന്ന ഈ ചിത്രം രചിച്ചിരിക്കുന്നത് ജിജോ പുന്നൂസും നിർമ്മിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരുമാണ്. സന്തോഷ് ശിവൻ ക്യാമറ ചലിപ്പിക്കുന്ന ഈ ചിത്രത്തിന് സംഗീതം ഒരുക്കുന്നത് ലിഡിയൻ നാദസ്വരവും എഡിറ്റ് ചെയ്യുന്നത് ശ്രീകർ പ്രസാദുമാണ്. നാനൂറു വർഷം പ്രായമുള്ള ബറോസ് എന്ന് പേരുള്ള ഒരു ഭൂതമായാണ് മോഹൻലാൽ ഇതിൽ അഭിനയിക്കുന്നത്. മിന്നൽ മുരളിയിലെ സൂപ്പർ വില്ലൻ ഗുരു സോമസുന്ദരവും ഈ ചിത്രത്തിൽ ഒരു പ്രധാന വേഷം അഭിനയിക്കുന്നുണ്ട്.