ഹാട്രിക് വിജയം നേടി വിനീത് ശ്രീനിവാസൻ; ജന്മദിനാശംസകൾ അറിയിച്ചു സോഷ്യൽ മീഡിയ..!

2019 എന്ന വർഷം വിനീത് ശ്രീനിവാസനെ സംബന്ധിച്ച് ഒരു ഭാഗ്യ വർഷമായി മാറുകയാണ്. ഈ വർഷം ഇപ്പോൾ തുടർച്ചയായ മൂന്നാം വിജയം ആണ് വിനീത് ശ്രീനിവാസൻ നേടിയെടുത്തിരിക്കുന്നതു. അൻവർ സാദിഖ് സംവിധാനം ചെയ്ത മനോഹരം എന്ന ചിത്രം കൂടി സൂപ്പർ ഹിറ്റായി മാറുമ്പോൾ വിനീത് ശ്രീനിവാസൻ എന്ന നടൻ കൂടുതൽ കൂടുതൽ മലയാളി സിനിമാ പ്രേമികളുടെ ഹൃദയത്തിൽ തന്റെ സ്ഥാനം ഉറപ്പിക്കുകയാണ്. ഈ വർഷം റിലീസ് ചെയ്ത തണ്ണീർ മത്തൻ ദിനങ്ങൾ, ലവ് ആക്ഷൻ ഡ്രാമ എന്നീ ചിത്രങ്ങളിലും മികച്ച പ്രകടനം കാഴ്ച വെച്ച വിനീതിന് ആ ചിത്രങ്ങളുടെ വിജയവും കരുത്തു പകരുന്നു. വിനീതിന്റെ ഇതുവരെ കാണാത്ത തരത്തിൽ ഉള്ള ഒരു പ്രകടനമാണ് ബ്ലോക്ക്ബസ്റ്റർ ആയ തണ്ണീർ മത്തനിൽ നമ്മൾ കണ്ടത് എങ്കിൽ വളരെ രസകരമായ മറ്റൊരു പ്രകടനമാണ് സഹോദരൻ ധ്യാൻ ശ്രീനിവാസൻ ഒരുക്കിയ ലവ് ആക്ഷൻ ഡ്രാമയിൽ കണ്ടത്.

അതിൽ നിന്നെല്ലാം ഏറെ വ്യത്യസ്തമായ പ്രകടനമാണ് ഇപ്പോൾ മനോഹരത്തിൽ ഈ നടൻ കാഴ്ച വെച്ചിരിക്കുന്നത്. മനു എന്ന കഥാപാത്രമായി ഏവരുടെയും സ്നേഹം പിടിച്ചു പറ്റുന്ന രീതിയിലാണ് വിനീത് അഭിനയിച്ചിരിക്കുന്നത്. കുടുംബ പ്രേക്ഷകർ ഈ ചിത്രത്തെ ഏറ്റെടുത്തു കഴിഞ്ഞു എന്നതാണ് ഇതിനു തീയേറ്ററുകളിൽ ലഭിക്കുന്ന കയ്യടി നമ്മുക്ക് കാണിച്ചു തരുന്നത്. ഇന്ന് തന്റെ ജന്മദിനം ആഘോഷിക്കുന്ന വിനീത് ശ്രീനിവാസന് ആശംസകൾ നൽകുകയാണ് സോഷ്യൽ മീഡിയ ഇപ്പോൾ. മനോഹരം കൂടി വിജയം ആയതോടെ വിനീത് ശ്രീനിവാസന്റെ താര മൂല്യവും ഉയർന്നു കഴിഞ്ഞു. സംവിധായകൻ കൂടിയായ വിനീത് തന്റെ അടുത്ത സംവിധാന സംരഭം അടുത്ത വർഷം ആരംഭിക്കും. അതിനു മുൻപ് വിനീത് നിർമ്മിക്കുന്ന ഒരു ചിത്രവും തീയേറ്ററുകളിൽ എത്തും.