വിജയ്- ആറ്റ്ലി ചിത്രത്തിന്റെ ഫാൻ മേഡ് പോസ്റ്റർ സോഷ്യൽ മീഡിയയിൽ തരംഗമാകുന്നു..!

തെരി, മെർസൽ എന്നീ ചിത്രങ്ങൾ നേടിയ വമ്പൻ വിജയത്തിന് ശേഷം ദളപതി വിജയ് ആറ്റ്ലിയുമായി ഒരിക്കൽ കൂടി ഒന്നിക്കുന്ന ചിത്രത്തിന്റെ ജോലികൾ തുടങ്ങി കഴിഞ്ഞു. വിജയ്‌യുടെ അറുപത്തിമൂന്നാമതു ചിത്രമായ ഈ ആറ്റ്ലി ചിത്രത്തിൽ വിജയ് ഒരു ഫുട്ബോൾ കോച്ച് ആയാണ് അഭിനയിക്കുന്നത് എന്നാണ് സൂചന. ഇതിനു മുൻപ് ഗില്ലി എന്ന വിജയ് ചിത്രമാണ് കായിക ഇനവുമായി ബന്ധപെട്ടു അദ്ദേഹത്തിന്റെ കരിയറിൽ വന്നിട്ടുള്ളതു. ഈ ആറ്റ്ലി ചിത്രത്തിൽ ഫുട്ബോൾ പ്ലയെർ ആയാണോ കോച്ച് ആയാണോ വിജയ് അഭിനയിക്കുന്നത് എന്നത് ഇത് വരെ സ്ഥിതീകരിച്ചിട്ടില്ല. ഏതായാലും അദ്ദേഹത്തിന്റെ ജേഴ്സി നമ്പർ 63 ആയിരിക്കും എന്ന് സൂചനകൾ ഉണ്ട്.

ഈ സൂചനകളെ അടിസ്ഥാനമാക്കി ആരാധകർ ഉണ്ടാക്കിയ ഈ ചിത്രത്തിന്റെ ഫാൻ മേഡ് പോസ്റ്റർ ഇപ്പോൾ സോഷ്യൽ മീഡിയയിൽ ട്രെൻഡ് ആയി മാറിയിരിക്കുകയാണ്. എ ആർ റഹ്മാൻ സംഗീതം ഒരുക്കുന്ന ഈ ചിത്രത്തിൽ പ്രശസ്ത തെലുങ്കു/കന്നഡ നടി രശ്‌മിക ആയിരിക്കും നായിക എന്ന സൂചനയും ലഭിക്കുന്നുണ്ട്. ജി കെ വിഷ്ണു ഛായാഗ്രഹണം നിർവഹിക്കുന്ന ഈ ചിത്രം എഡിറ്റ് ചെയ്യുക ആന്റണി റൂബൻ ആണ്. എ ജി എസ് എന്റെർറ്റൈന്മെന്റിന്റെ ബാനറിൽ കലപതി എസ് അഘോരം, കലപതി എസ് ഗണേഷ്, കലപതി എസ് സുരേഷ് എന്നിവർ ചേർന്നാണ് ഈ ചിത്രം നിർമ്മിക്കുന്നത്. അടുത്ത വർഷം ദീപാവലി റിലീസ് ആയി ഈ ചിത്രം തീയേറ്ററുകളിൽ എത്തും. ഈ ചിത്രത്തിന്റെ ഷൂട്ടിംഗ് അടുത്ത മാസമോ അല്ലെങ്കിൽ ജനുവരിയിലോ ആരംഭിക്കും എന്നാണ് ഇപ്പോൾ ലഭിക്കുന്ന റിപ്പോർട്ടുകൾ പറയുന്നത്. ചിത്രത്തെ കുറിച്ചുള്ള കൂടുതൽ വിവരങ്ങൾ വൈകാതെ പുറത്തു വിടും.